Nongpoh, Ïaiong 20: Ka Khasi Students Union, Nongpoh Circle kaba hap hapoh ka jingpeit jong ka North Khasi Hills District Unit ha ka sngi ba ar, ka la plie pyrda ïa ka (L) Sabathani Lyngdoh Memorial Football Tournament 2022 ha Madan Saiden, kum shi bynta ban kynmaw ïa utei u samla u ba la noh ïa u synñiang u bynhei sha ka jaitbynriew lyngba ka jingshakri kum u dkhot ba shitrhem ka KSU.
Ïa katei ka lympung ïalehkai la wan ban plie da u Bah Successful Lyngdoh Rangbah Shnong ka Saiden kum u kongsan, u Bah Lambok Rymbai Vice President ka KSU North Khasi Hills District kum u symbud kongsan, haka jingdonlang u Bah MG Kharshanlor Asst. Rangbah Shnong ka Saiden u Samla John Lyngdoh President ka KSU Nongpoh Circle bad kiwei kiwei ki nongïalam ka seng haka jingdonlang ka lok ki khun ki kti bad ki bahaiing hasem jong u (L) Sabathani Lyngdoh.
Naka liang u Bah Successful Lyngdoh kum u kongsan bad kiwei kiwei ki nongkren ha katei ka sngi kila pynpaw ka jingsngewkmen ba ka KSU kala shim ïa katei ka sienjam ban pynlong ka lympung ïalehkai phutbol kum ka jingkynmaw burom ïala u paralok u ba la ïatreilang naka bynta ka jaitbynriew bad ka dei ka jingpyni ïaka jonglong ïatylli jong ka KSU kaba kynmaw ieid ïaki para dkhot kiba ïatreilang haka juh ka shatri bad lyngba katei ka lympung kan long ka jingai burom ban pyrto ïa u synñiang u bynhei kiba une u samla u la ai sha ka jaitbynriew haki por ba u dang im.
Na ka Liang ka KSU ka ai Khublei ïa i Lok Jong u (L) Samla Sabathani Lyngdoh kiba la wan ban synran lang bad ban sakhi ha kane ka jingplie ïa kane ka Football Tournament ha ryngkat ki khun jong une u samla.
Ka jingïalehkai ha katei ka sngi kala long hapdeng ka shnong Saiden pyrshah ïaka Dame La Jop FC bad kane ka jingïalehkai kala long kaba shongshit bala wan ruh ban sakhi lang da ki paidbah nongpeit kai bad ha ka jingïakhun kaba jur ka Dame La Jop kala rah ïaka nam jop ba nyngkong jong katei ka lympung da kaba pynliem noh ïaka Saiden da 2-1 kol.