Shillong Naitung 04: U Myntri Rangbah ka jylla u Conrad K Sangma ha ka sngi nyngkong u la ïathuh ba ka sorkar jylla shen kan sa thung noh da education commission ban pynbeit pynryntih ïa ka rukom pynïaid ïa ki skul shimet ha ka jylla.
“Katba ngi dang ïa jam sha khmat kum ka jylla ngi donkam ruh ban wanrah ïa ki rukom kiba thymmai na bynta kane ka kam. Nga shu ai ksai lupa ïa kane ba shen ngin thung da ka Education Commission kaban peit ïa ki jingeh ba bun syrtap bad ba jyrwit jyrwat ïa ki skul shimet” ïa kane la ïathuh da u Myntri Rangbah haba jubab ïa ka jingkylli kaba ki nongthoh khubor ki buh ïa u halor ka jingbym lah ki School Managing Committee(SMC) ban synïang lem na bynta ka bit ka biang bad ka jingsiew tulop ïa ki nonghikai.
“Khlem artatien ynda ka ‘ïa ka la biang ngin pyrshang ban pynbeit pynryntih ïa ka jingtreikam ki skul ad-hoc” u la bynrap.
Kane ka mat ka mih dei ynda haba ki nonghikai jong ki skul shimet ki la pynlong ïa ka jingïakhih kaba khlem buh por da kaba thiah ha ki lynti bad ha surok ban dawa na ka sorkar ban kyntiew tulop salonsar da 18,000 ba ka jingkyntiew tulop ba man u snem ne increment ba 5%. U Myntri Rangbah u la ong ruh ba dei ki SMC kiba pynïaid bad long trai ïa ka skul ka sorkar lei ka shu ïarap ïa ki.
U Myntri Rangbah u la ong ruh ba ïa ki skul shimet dei ban pynïasyrïiem bad ki hospital shimet “Phi lah ban ïohi hi ba kam dei tang ka jingkitkhlieh jong ka sorkar ïa baroh ki skul shimet hynrei kum kiba don jingkit khlieh ïa ki nonghikai bad ka pule puthi ngi don ka jingsngew na ka bynta jong ki namar ki la noh la u synïang uba khraw bha sha ka thoh ka pule bad dei na kata ka daw ba kum ka sorkar ngi ai ka jingkyrshan sha ki, hynrei ïa ka rukom pynïaid skul da ki SMC ngam don eiei ban kynthoh ïa kane” ong u Myntri Rangbah
