Shillong, Jymmang 09 : Ka National’s People Party (NPP) ha ka sngi Nyngkong ka la pdiang burom ïa ka Dr. Jasmine Lyngdoh sha ka party bad pynbna ruh ïa ka kyrteng jong ka kum ka kyrtong jong ka Party ban aireng ha ka elekshon MLA na Nongthymmai Constituency ha u snem 2023.
Ïa ka Dr. Jasmine Lyngdoh la pdiang burom da u National Vice President ka NPP ba dei ruh u Symbud Myntri Rangbah ka Jylla Bah Prestone Tynsong ryngkat ka jingdonlang u State President Dr. WR Kharlukhi, nangta u Bah Sniawbhalang Dhar, Bah Pynïaid Syiem kumjuh ki MDC ka party nalor kiwei kiwei.
Shwa kane, u President u la pynskhem ruh ïa ka Block Committee jong ka Nongthymmai NPP.
Na ka liang u Bah Prestone haba kren ha katei ka jingïalang kaba long ha Nongthymmai, u la kyntu ïa ki nongkitkam jong ka Block ba kin sdang noh shaid ïa ka jingtrei nangne shakhmat khnang ban pyntikna ba ka Dr. Jasmine kan dei kawei na ki kyrtong kaban khur ïa ka jingjop ha u 2023.
U Bah Prestone u la ong ruh ba la kadei ha ki kam iing ne kam party ne wat ha kiwei kiwei ki kam kiba ju trei bha ka ju don beit ka jingshah kren ne shah lynthem maw.
“Hynrei kane ka pynlong pat ïa ngi ban nang ksah bad nang lah ban trei khambha shuh shuh ha ki liang baroh, u la ong.
Nalorkata, u la ong ruh ba khlem pep ynda la shongshit bha ka jingpynkhreh elekshon kan sa mih beit ka jingkynthoh beit ba kadei ka politik shi-ïing namar ba ka hynmen jong i Dr. Jasmine Lyngdoh kata i Kong Ampareen Lyngdoh ruh ka dei ka nongmihkhmat.
“Hynrei na ka party haba ngi jied ïa ki kyrtong ngim ju peit na ka longïing, ” u la bynrap shuh shuh.
Shwa kane, u President ka NPP Meghalaya, Dr. WR Kharlukhi ba dei ruh u MP. ka Rajya Sabha u la ong ba ka Dr. Jasmine ka wan na ka longiing ka ba ïakhun ban don barabor ka shong suk shongsaiñ kata naduh u kpa jong ka u Bah PG Marbañiang, hynmen jong ka Bah RG Lyngdoh kumjuh ka hynmen jong ka ka Dr. Ampareen Lyngdoh ka ba dei ka MLA ba mynta jong ka Laitumkhrah.
Haba kren pat halor u pud u sam u la ong ba ha ki snem bad ha ki sorkar ba mynshwa mynshwa ka jingmut status quo ka long beit ba ka sorkar Assam ka nang kyntur bad ka Meghalaya pat ka nang kynran.
Da ka kynthoh ïa ki party kiba pyrshah halor ka jingpynbeit pud u Dr. Kharlukhi u la ong ba ka sienjam ba ka TMC ka shim ka long ban pyrshang ban ïalam bakla bad pynthame ïa ki paidbah halor katei ka phang.
Na ka liang u Bah Sniawbhalang Dhar pat u la ong ba ki tip lut ïa ka longiing jong ka Kong Jasmine kaba la shakri la da ki phewsnem ïa ka thaiñ. “Ngi tikna ba i Kong Ampareen in sa jop biang bad I Kong Jasmine ruh kumjuh, ” u la ong da kaba kyntu ïa ki nongtrei jong ka party ban trei borbah khnang ba ka NPP kan ïoh ïa u magic number kata ban jop haduh 32 ngut ki MLA.
U ong ruh ba ha rilum Jaintia ki don ka jingkyrmen ban jop lut baroh 7 ngut kumjuh ha Ri Bhoi.
Haba bynrap lang, u Bah Pynïaid Syiem MLA ka Mawryngkneng u la kyntu ïa ki nongkitkam jong ka Block ba ki dei ban trei da ka jingïasngewthuh jingmut bad ka jingïatylli khnang ba yn dup lah ban khring shuh shuh ïa kiwei pat sha ka NPP ha ka jingpynkhreh ïa ka elekshon MLA kaban long ha u 2023.
“Mynta ngi don tang 23 ngut ki MLA ha Iing Dorbar hynrei ha u 2023 ngi kwah ban jop noh 32 bad ïoh synshar marwei, ” u la ong.
Ka Dr. Jasmine ha ka jingkren ka la ong ba ka daw kaba pynlong ïa ka ban jied ïa ka National People’s Party (NPP) kadei namar ka ïohi ba ki don ki nongïalam kiba radbah kiba la lah ban jop ïa ka jingeh kaba khraw ha ka jingïakhun ïa ka khlam COVID.
