Da ka dorkhas pynher ka Seng Samla Khappud sha u DC Ri Bhoi ban peit lem ïa ki jingdonkam ki paid Khappud

Nongpoh, Nailar 08: Ka Seng Samla Border Area Raid Nongtung mynta ka sngi ka la pynher syndon da ka dorkhas sha u Deputy Commissioner ka Ri Bhoi ban kyrpad lem ban phai khmat ïa ki kam pynroi na ka sorkar Meghalaya halor ki jingdonkam jong ki paidbah khappud ïa ki kam pynroi na ka sorkar Meghalaya.
Na ka liang ka Seng Samla Border Area Raid Nongtung ka la leit ban aiti mynta ka sngi ïa katei ka dorkhas sha u Deputy Commissioner ka Ri Bhoi District lyngba u Additional Deputy Commissioner ka Ri Bhoi, u Bah M.B Tongper hadien ba na ka liang u Deputy Commissioner u khlem don ha ka ophis treikam na ka bynta kiwei pat ki kam jong ka bor synshar District.
Kitei ki kam pynroi ba ka Seng Samla Border Area Raid Nongtung ka la kyrpad ban tuklar lem u Deputy Commissioner ki kynthup ban shna noh ïa ka surok na Mawlasnai – Jatalong kaba don kumba 2 km ka jingjngai ba la tei lyngba ka skhim RIDF naduh u snem 2015-2016 ba ka la sniew noh bad ba ki paidbah ki la kynduh jingeh ha ka leit ka wan na ka jingsniew palat katei ka surok.
Na ka liang ka seng samla ka la kyrpad ruh ban wan rah da ka Solar Light System na ka bynta ka shnong Umsohlaper kumba 52 tylli ki longing, namar kumba long haduh mynta ka sorkar Meghalaya kam pat lah ban wan rah ïa ka bording Ilektrik na ka liang ka sorkar Meghalaya.
Ki la pynpaw ruh ba ka solar Light System ba la wan ai da ka sorkar Meghalaya ha ka shnong Sabuda naduh us nem 2017-2018 ka la sniew bad la donkam ban ioh thymmai noh bad kum ka seng samla ka la kyrpad jur ïa u Deputy Commissioner ka Ri Bhoi ba un shim khia lem ïa kine ki jingdonkam ki paidbah ha katei ka thaiñ khappud.
Shuh shuh, na ka liang ka Seng Samla katkum katei ka dorkhas ba la phah sha u Deputy Commissioner ka Ri Bhoi District, ki la buhr uh ka jingkyrpad ba un shim khia ban phah pynsangeh ïa ka jingwan ai bording ilektrik ka sorkar Assam naduh ka 13 tarik u Naitung 2022 ha kitei ki shnong khappud, ba kum ki shnong Khasi ki pyrshah bad ki kwah ba ïa kane ka jingsam bording dei ban wan na ka sorkar Meghalaya.