Da ka Dorbar Bah ki nongtrei Muster Roll, yn pynlong haka 22 tarik ha madan Malki: President

Jowai, Naiwieng 17: Ka All Jaiñtia Muster Roll Worker & Labour Union (CEC) hadien ka jingïalang kaba la pynlong mynta ka sngi 17 tarik ha Dorbar Hall ka Chilliang Raij, Jowai kila shim ïaka rai ban pynlong da ka ‘Dorbar Bah’ jong ki nongtrei Muster Roll hapoh ka jylla ha kane ka 22 tarik u Naiwieng, 2025 ha madan Malki Shillong.
Na ka liang u President ka AJMRW&LU ma K.L. Pariat ula ong kum ka seng ki nongbylla sngi kaba la treikam naduh u snem 2017 kila dep ban ïakren na ka por sha ka por bad ka sorkar ban pynkiew ïa ka bai nong jong ka kum ka (Floor rate) kaba long shisien san snem bad kaba ar ka Variable Dearness Allowance (VDA) kaba pynkiew ar sien shisnem lada kiew ki marbam katkum ka Minimum Wages Act 1948.
Hynrei mynta ka kynti 2025 ka sokar jylla kam shem la pynkiew shuh ïa ka bainong bad hadien ka jingïakren bad ka sorkar halor kitei ki jingsiew kiba dei hok ban ïoh, na ka liang ka seng kala pan syndon da ka jingthoh na ka sorkar hynrei haduh mynta kam shem la ïoh pdiang.
Shuh shuh u President ma K. Pariat ula ong kum ka seng kala shim ïa ka rai ban pynlong noh da ka Dorbar Bah jong ki Muster Roll ha kane ka 22 tarik u Naiwieng, 2025 ha madan Malki Shillong bad ki mat kiba donkam ban ïakren ki long kyrpang halor ka jingbym shai ka rukom siew ïaka VDA, ka Floor rate ba shisien sansnem bad kiwei de.
Katkum ka jingïoh jubab jong ka seng na ka sorkar la ong ba kim lah ban pynkiew ïa kane ka dor VDA namar la dep pynhiar ïa ka dor jong ki mar bam mar dih, hynrei haka jingwad jingtip ka seng ïa ka dor jong ki marbam na ki ïew ki hat la lap ba ka neh kumjuh naduh u dai, ka umphniang bam bad kiwei de ki marbam.
La pynsngew ruh ha katei jingïalang yn ïakren ruh halor ka rta ban shongthaid jong ki nngtrei Muster Roll hapoh ka jylla bad ban dawa pyntrei kam ïa ka Minimum Wages Act 1948, la kyrpad ïa baroh ki ophisar ba kin ailad ïa ki nongtrei Muster Roll ba kin leit sha katei ka jingïalang ha ka 22 tarik.
Kum ka seng ki nongrei Muster Roll kila ai ka jingïaroh ïaka kynhun myntri sorkar kala dep ban shim ïa ka rai ban pyntreikam ïaka Meghalaya Regular Casual Worker Scheme 1996, ka Union ka ai khublei ïa ka sorkar halor kane ka sien jam ban ïarap ïa ki Muster Roll kiba la trei 10 snem shanem ban ïoh ïa ki kam kiba hap hapoh ka Grade-VI.