Shillong, Jymmang : Ki nong saitjaiñ ha ka shnong Mawlai Umjaiur ki ba la ju mad jingeh baroh shikatta da kaba siang da ka plastik ha ba saitjaiñ, mynta ki la ïoh syndon da ka jaka saitjaiñ dewbilat na u MLA ka thaiñ u Bah PT Sawkmie u ba la leit ban plie ïa ka hynne ka sngi.
Haba plie ïa kane ka jaka saitjaiñ bad jaka tong um dih la don ryngkat u rangbah shnong bah K. Khyriem, bah Donboklang Kharlyngdoh, president ka HYC Mawlai Circle, ki rangbah dong, ki nong saitjaiñ ka Block, 3,4 bad 5 bad ki dkhot ka HYC, Mawlai Umjaiur.
Ha ka jingkren u Bah PT Sawkmie u la pynpaw ba naduh ba u wan jurip u don bha ka jingsngew haba ïohi ïa ka jinglong jingman kane ka jaka saitjaiñ namar u la ïohi ïa ka jingbym biang bym bit, sngewkmen pat ba mynta ka la kup ïa ka dur thymmai, na kajuh ka jaka, lah ban tong um bad ban saitjaiñ.
Nalor kata ula pynpaw ruh ba mynta la ïohi ïa ka jingkhuid jingsuba jong ka jaka bad ïohi ruh ïa ka um kaba i shngiam ban dih. U bah Sawkmie u pyntip ba u la mang 2 lak na ka skhim jong u ban shna ïa kane ka jaka saitjaiñ.
Shuh shuh ha kane ka sngi la ïoh ruh ïa ka jingkren na u rangbah shnong ka Mawlai Umjaiur, na u bah Donbonlang Kharlyngdoh bad na u D. Sun, secretary ka HYC Umjaiur, bah T. Nongrem, u President ka HYC Mawlai Umjaiur Unit, uba pynïaid ïa ka jingïalang, kiba la ai khublei bad pynpaw ka jingsngewnguh ïa u MLA ha ka ba ïa dei bad ka jingpynioh ïa kane ka jaka saitjaiñ.
