Shillong, Risaw 14 : Kum shi bynta ban pynmih pisa na ka bynta ka Person to Patient Fund jong ka Dr. H Gordon Robert’s Hospital, ka Aroha Music and Cultural Society da ka jingïatreilang bad ka Dr. H Gordon Robert’s Hospital kan pynlong ïa ka ‘Symphony in Support’ Concert ha Soso Tham Auditorium ha ka 19 tarik Risaw, 2024 naduh ka por 5 baje janmiet.
Ha ka jingïakren bad ki lad pathai khubor ha Shillong Press Club, ka nongseng jong ka Aroha Music and Cultural Society ka Kong Pauline Warjri ka la ïathuh ba ka jingpynlong ïa kane ka premmiet ki sur jingrwai ka long ban pynurlong ïa ka jingangnud jong u Kpa jong ka, u Bah AH Scott Lyngdoh uba ju kwah ban noh synñiang sha ka Hospital.
“Ngam shym la lah ban leh eiei mynba i Pa i dang im hynrei mynta ba i la khlad ngan hap ban pynurlong ïa ka jingkwah jong i,” la ong ka Kong Warjri.
