Nongpoh, Jylliew 10: U MLA ka Nongpoh u Bah Mayral Born Syiem mynta ka sngi u la leit ban plie paidbah syndon ïaka Computer Lab kaba don kumba 10 tylli ki kor komputer jong ka skul St. Joseph Higher Secondary School Umden, naka bynta ka jingmyntoi jong ki khynnah kum ha kane ka juk kaba ka kor computer ka long kaba donkam bad kongsan shibynta jong ka jingpule, ïaka kaba la mang pisa lyngba ka skhim SRWP jong u snem 2021-22.
La sakhi ruh ha katei ka sngi ka jingplie ïa katei ka Computer Lab da ka jingdonlang u Fr. Peter Syiemlieh Parish Priest ka Umden Parish, u Fr. Joakim Principal ka St. Joseph HSS, ki nonghikai lem bad ki khynnah skul.
Haba kren ha katei ka sngi naka liang u Bah Mayral Born Syiem kum u kongsan u la pynpaw ka jingsngewkmen hadien bala lah ban plie bad aiti ïaka computer lab ryngkat bad 10 tylli ki kor computer ba katei ka skul ka ioh ban pyndonkam bad ban ai jinghikai ïaki khynnah skul, kumba ka kor computer ka dei kaba donkam ba ki khynnah kin nang khamtam ha kane ka juk stad kaba mynta kaba baroh ki kam la trei bad pyndep beit lyngba ki kor computer kaba wanrah ruh ka jingpynsted haka rukom treikam.
