Shillong, Naitung 24: Ka Khasi Hills Autonomous District Council (KHADC) ka la thaw ka committee ki laingut ki dkhot ban tohkit ïa kiba bun ki jingkynnoh ba ïadei bad ka Khlaw Mawpat. Ïa kane ka committee, la khlieh da u Joint Secretary J Dkhar, kaba kynthup ïa u Deputy Secretary ka Land A Syiem bad u Under Secretary ka Political S Lamare.
Ïa kane ka rai la shim da ka Executive Committee ba la ïalam da ka Voice of the People Party (VPP) ha ka jingïalang kaba la long ha ka sngi Palei, shisngi hadien ba ka kynhun ba la ïalam da u chief executive member (CEM) u Bah Shemborlang Rynjah ki la leit ban jurip ïa kane ka khlaw.
“Kane ka committee kan tohkit ïa baroh ki jingshah kynnoh halor ka jingïoh jaka da ki MLA bad kiwei ki seng hapoh ka khlaw Mawpat,” ïathuh u executive member (EM) u Bah Powell Sohkhlet sha ki lad pathai hadien ka jingïalang.
“La bthah ïa ka committee ba kan aiti ïa ka kaiphod ba la tohkit hapoh ka 3 bnai. Shisien ba la ïoh ïa ka kaiphod, ka Executive Committee kan ïasyllok bad kan shim ka rai haba ïadei bad kane ka khlaw,” u la bynrap.
U EM shuh shuh ula ïathuh ba ka committee kan shong bishar ïa ka rai ba mynshwa jong ka Executive Committee ba la pyndam noh ïa ka jingpynbna ïa katei ka khlaw kum ka “Law Adong” ha u snem 2014.
Katkum ka jingïathuh jong u, kane ka committee kan pule bniah ïa ka jingïamynjur ba la ïasoi hapdeng ka EC barim u Bah Ardent Basaiawmoit bad u Syiem barim ka Hima Mylliem u Paiem Latho Manik Syiem bad kiwei pat ki jingktah ha kane ka khlaw.
Shuh shuh ula ïathuh ruh ba ka committee kan tohkit ruh kumjuh halor ka jingdon ki lum jingtep bad ban rai la kane ka jaka ka dei kaba la ai sngewbha ne dei kaba la ïadie.
Lah ban ong ba ka khlaw Mawpat la pynbna mynshwa kum ka “Law Adong” ha u snem 2014, ka rai kaba hadien la wengnoh ha u snem 2019, bad ïa kane ka khlaw la pynphai biang sha ka Hima Mylliem.
Haba kylli, u Bah Sohkhlet u la ong ba ka rai jong ka EC barim u Bah Basaiawmoit bad u Syiem barim ka Hima Mylliem ka la long ka sienjam ka lynti kaba dei ban ïada ïa kane ka khlaw bad ka sawdong sawkun jong ka.
“Ngi sngew ba kane ka rai ka dang dei ban bteng da ka executive committee ba thymmai ban ïapynïaid lang haba ïadei bad kane ka khlaw ha Mawpat. Ha ka jingshisha ïa kane la leh katkum ki kyndon jong ka Sixth Schedule ka riti synshar ka ri India ba ka district council ka dei ban ïada, ban tyngkai bad ban pynneh pynsah ïa ka sawdong sawkun,” u la bynrap.
