Shillong, Jylliew 24 : Ka Don Bosco Youth Centre Laitumkhrah, Shillong ha ka sngi Nyngkong ka la plie ïa ka coaching program na bynta ki khun samla kiba don ka jingthmu ban ïakhun ïa ka eksam MPSC, SSC bad ki eksam ïakhun kam ha ki Bank nalor kiwei kiwei eksam ïakhun kam.
Kane ka jingai jinghikai kadei ka sienjam ba thymmai na bynta ka Youth Centre namar kane kan plie lad ïa ki samla ban ïoh jinghikai bad ki jingpynshai halor kine ki eksam bapher bapher.
Ïa kane ka jingai jinghikai la wan ban plie da u Deputy Secretary ka tnad Forest ka sorkar jylla, Bah Ronnie Wahlang ryngkat ka jingdonlang u Director ka Youth Centre, Fr. Michael Makri nalor kiwei kiwei.
Na ka liang u Kongsan haba kren ha kane ka jingïalang u la kyntu ïa ki samla ba kin shim kabu ïa katei ka lad ba ka Youth Centre ka plie na bynta jong ki. “Ha ka jingim phin kynduh bun ki jingeh kum ki samla hynrei phi dei ban don barabor ïa ka mynsiem ïakhun khnang ba phin lah ban jop ïa kita ki rai-eh rai-dam,” u la ong.
Katba na ka liang u Director pat u la ai mynsiem ïa ki samla ba lada long kumno kumno ruh kim dei satia ban duh jingkyrmen hynrei ba kin thom ïa ki jingeh ba ki ïa kynduh khnang ba kin lah ban poi sha ka thong.
