Shillong, Risaw 03 : Kum ka sienjam ban shimkhia ha ka ban leh eiei ïa ka jingpass duna ki khynnah ha ka jylla Meghalaya, u Myntri Rangbah ka jylla u Conrad K Sangma ula sdang ïa ka sienjam ban kyrshan ïa ki khynnah pule, nonghikai bad ki kmie ki kpa.
U Conrad K Sangma mynta ka sngi Palei ula pyllait paidbah ïa ka jingtreikam jong ka CM IMPACT na ka bynta ka Garo Hills ha kaba la ïadonlang u Myntri ka pule puthi u Rakkam A Sangma.
Kum shi bynta jongka CM IMPACT, ka tnad pule puthi kan ai ïa ki Guidebook ïa ki khynnah pule, nonghikai ka ban long ruh ha ka dur jongka App, ka ban don man la ka por ka updates ne ka jingpynrung ïa kino kino kiba long thymmai.
Yn pynbiang ruh ïa ka Internet ha ki block na ka bynta ba kin ïoh pyndonkam.
Haba sam ïa ki Guidebooks sha ki nonghikai, u Myntri Rangbah ula ong ba ka long kaba kongsan ba kiba don bynta baroh ban ïakynduh man la ka por ban ïakren bad ban pynkhreh man la ki por ïa ki lad ki lynti ban shimkhia ïa katei ka jingeh.
Haba pdiang ba ka don ka jingeh ha kaba ïadei bad ka pule puthi, ula ong “Ngi hap ban law ïa ki jyrwit jyrwat bad ban jam shakhmat da kaba don ïa ka thong. Ngi la don ïa ka jingthmu ban pynbha ïa ka pule puthi. Ka jingthmu ka long ban kyntiew ïa ka bha ka miat bad ïa ka kyrdan bad kumjuh ïa ka jingpass bha”.
Ula kyntu ïa ki nonghikai ban weng ïa ki jingeh ban kyntiew ïa ka jingpass bha ki khynnah bad ban shimkhia ïa katei ka mat. Ula bthah ruh ïa ki nonghikai ba kin phiah ïa ki khynnah pule ban lap ïa ki jingduna ki jongki bad ban leh eiei ha ka ban pynbha ïa ka jingioh marks.
Ula kyntu ruh ïa ki nonghikai ban pynlong ïa ki khynnah kiba la pynkhreh ba kin lah ban pass ia ki eksamin.
