Da ka Central Ri-Bhoi CA la seng ha Ri-Bhoi, yn pynlong ïaka lympung ba khlem donkam jingsiew

Nongpoh, Rymphang 25: Da ka jingangnud ban kyntiew ïa ka jingïalehkai kriket ha dong bad thaiñ Ri-Bhoi, ki katto katne ki riew rangbah kiba ieid ïa kane ka jingïalehkai ki la mih shakhmat ban seng ïa ka kynhun ba thymmai kaba la tip kum ka Central Ri-Bhoi Cricket Association (CRCA).
Ïa kane ka kynhun la lamkhmat da u Bah Donkupar Sumer kum u President bad u Bah Rocky Marweiñ kum u Vice President, ryngkat bad kiwei pat ki nongkitkam kiba thrang ban ai ka rynsan kaba paka ïa ki khun samla donsap ha ka thaiñ.
Haba ïakren bad ki lad pathai khubor, u Bah Donkupar u la pynpaw ba ka thong jong ka CRCA ka long ban pynrhem ïa ki samla kiba ju ïalehkai da ki tennis ball ba kin kiew sha ka jingïalehkai kaba ryntih da ki ball ba ju lehkai haki madan heh ne real “duce”. U la ong ba tang da ka jingïalehkai kaba biang bad ka rynsan kaba paka yn lah ban sei madan ïa ka sap jong ki samla bad plie lad ïa ki ban poi sha ki kyrdan kiba kham shalor.
Halor ka jingïadei bad ka Ri-Bhoi District Cricket Association, u la batai ba ka jingiar jong ka district ka pynlong ïa ka ban shem jingeh ban kyllum lang ïa baroh ki bynta. Kumta, ka CRCA kan trei kum ka nongïarap ban pyniar bad pynkhlaiñ shuh shuh ïa ka cricket ha ka thaiñ, ym ban wanrah jingïaknieh ne jingthut.
Kum ka jingïaid lynti ba nyngkong, ka CRCA ka la pynbna ïa ka League Cricket kaba yn sdang naduh ka 21 tarik Lber ha Ri-Bhoi. Ha kane ka lympung yn ïalehkai tang da ki ball real duce, bad la pynpaw ruh ba ki kynhun kiba shim bynta kim donkam ban siew bai rung.
Ka CRCA ka kyrmen ba lyngba kane ka sienjam, yn lah ban sei ïaki samla donsap sha ki kyrdan ba kham shalor bad wat shabar jylla ruh, bad ban pynlong ïa ka Ri-Bhoi kum kawei na ki thaiñ kiba khlaiñ ha ka jinglehkai cricket.