Nongpoh, Jymmang 30: Shibynta ban btin lynti ïaki khun samla ba kin tip ban jam shano hadien ki jingpule jong ki bad khamtam ban ai mynsiem ïaki ba kin nang kiew shaphrang haki jingpule jong ki, ka Ri-Bhoi Socio Economic and Youth Development Society (RSEYDS) mynta ka sngi kala shim ïaka sienjam ban pynlong da ka Career Guidance Programme ha Little Flower School Mawbri.
Ha katei ka prokram da ki spah ngut samla pule jong ki skul bapher bapher ka skul Eastern Ri-Bhoi kila wan ban shim bynta ban shah hikai ha katei ka prokram kaba la ai jingmyntoi shikatdei ba kin nang ban jied ïaka lawei ban shim ka rai haki jingpule ba kham shalor bad ruh ban pynshlur ruh ïaki khun samla ba kim dei ban shaniah tang haki kam sorkar hynrei ban nang ban sengkam sengjam.
La wan ruh ban ai jinghikai ha katei ka sngi da u Dr. Maxwell Lyngdoh u ba dei u Counselor bad Career Expert ryngkat u Samla Hame Shaniah Suiam u rangïalehkai Kickboxing ba paw haka pyrthei u ba la ai jinghikai ha kaba ïadei bad ka koit ka khiah bad ka jingdonkam ban kilan met bala sakhi ruh da ka jingdonlang u Bah George B Lyng doh MLA, u Bah Cornelius Laloo uwei naki nongthoh khubor, u Bah Comfort Rympei President ka RSEYDS, Samla Pyrchah Rympei Secretary bad kiwei kiwei.
Naka liang ki nongkren ha katei ka sngi kila ai mynsiem ïaki samla pule ba ki dei ban nang ban jied ïaka lynti bad ka sap kaba ki don ym ban shu bud tynneng ïaki paralok, bad kidei ruh ban don ka thong haka jingim jong ki ba kin minot thop haki jingpule jong ki ym ban long ki samla kiba duh jingkyrmen bad pyrkhat ïaka lawei, kumba bun naki samla khamtam haki thaiñ nongkyndong kim tip shano ban leit bad ban leh hadien ka jingpule jong ki.
