Da ka briew bym don jingïadei ha ka politik kwah u Myntri ban thung Chairperson MSCW

Shillong, Jylliew 15 : U Myntri ka tnad Social Welfare, Bah Paul Lyngdoh haka sngi Palei u la ong ba ka sorkar ka kwah ban thung da ka briew ka bym don jingïadei ha ka politik ban shimti kum ka Chairperson jong ka Meghalaya State Commission for Women (MSCW).
U Myntri u la ong ruh ba ka rai ban weng noh ïa ka chaiperson barim, ka Kong Phidalia Toi kam dei satia kaba la shu leh da kaba ïohsngew nangne nangtai namar u kwah ban jied ban leh ïa kaba dei ym ban leh tang ban pawnam ïalade halor kane ka ishu.
Katei ka jingkren jong u kadei shisngi hadien ba ka MSCW ka la kynnoh ba ka jingweng ïa ka chairperson ka dei ka bym lah satia ban pdiang bad u Myntri u la ïoh pdiang ïa ki jingtip ki bym dei kiba kynnoh ba katei ka chairperson ka la pep haduh 3 na ki saw tylli ki jingïalang jong ka Commission.
Hynrei haba kren pat bad ki lad pathai khubor, u Myntri u la ong ba ka tnad mynta kan sa buh da ka search committee kaban wad ïa ka chairperson kaba thymmai jong ka Commission.
“Ka la paw ha ki lad pathai khubor bunsien ba balei la shu jied ïa ki briew kiba don bynta ha ka politik. Kumta kane kadei ka mat kaba ka sorkar ka don ba ngni sa thung noh da kiwei pat ki bym don bynta ha ka politik kiba lah ban trei bad kiba sngewthuh ïa ka ishu jong ki longkmie,” u la ong.
Halor ka jingkam jong ka MSCW, u Myntri u la ong, “Ngam shym la pynmih ïa ka hukum tang na kaba ïohsngew nangne nangtai hynrei nga la da peit ïa ki kot ki sla.”
Haba jubab halor ka jingkylli, u Myntri u la ong ba kadei shi bynta jong ka jingtohkit hadien ba ka la mih ka jingkynnoh don bynta jong ka ha ka jingïalap elekshon. U ong ruh ba um don bynta ei ei ïa ka shimet hynrei u shim pat ba katei kadei ka ishu kaba dei na bynta ka kam ba ka bat.
Na ka liang u Myntri u la pyntip ruh ba un sa ïa kren bad u Myntri Rangbah halor kane ka ishu.