Nongpoh, Ïaiong 29: Ka ophis u Deputy Commissioner Ri Bhoi District kum ka jingïashim bynta lang haka Northeast Festival 2022 kaba dei ruh shibynta jong ka Azadi ka Amrit Mahotsav ka jingrakhe dap 75 snem jong ka ri India, ka jingdap 50 snem ka jylla bad kumjuh ruh ka jingpynphriang ïaka khubor halor hok ki khynnah kynthei (Beti Bachao Beti Padhao) ka ophis u Deputy Commissioner Ri Bhoi district mynta ka sngi kala pynlong da ka rally thuk thuk bala shim bynta da ki kynhun ñiah bike ka jylla.
Ïa katei ka rally la plie da u Arpit Upadhyaya Deputy Commissioner ka Ri-Bhoi District kum u kongsan haka jingdonlang u Bah MB Tongper Additional Deputy Commissioner, Bah DD Umdor President ka Royal Enfield Riders’ Association of Meghalaya (RERAM) bad ka kynhun ki nongniah bike ka jylla hapoh ka lama ka RERAM bala sdang naduh ophis u Deputy Commissioner Ri-Bhoi District sha Jorabat bad pynkut ha Umroi.
Lyngba ka tei ka rally kan long ruh ka khubor lehkmen ïaka District hadien ba kala ioh iaka kyrdan ba 5 napdeng ki Aspirational District haka ri India baroh kawei halor ka jingpyntreikam ïaki skhim sorkar bapher bapher bad ruh naka liang ka district ka buh thong ruh ban poi sha ka kyrdan ba hakhlieh duh haka ri.
Haba kren ha katei ka sngi naka liang u Arpit Upadhyaya Deputy Commissioner ka Ri-Bhoi District u la pynpaw ka jingsngewkmen kaba khraw bala naka liang ka ophis kala lah ban pynlong kum katei ka jait prokram kaba dei ruh shibynta jong ka North east Festival 2022 ka ban sdang naduh ka 28 tarik Ïaiong haduh 4 tarik Jymmang shuwa ban rakhe ïaka jingdap 75 snem jong ka ri India bad naka liang ka district kan sa rakhe ruh ïaki prokram bapher bapher ha kine ki taiew.
