Da ka bam khana shnong pynlong ka Mawkhla Mawsyntai ban wanrah ka jingïeid bad jingïatylli

Nongpoh, K’Lyngkot 08: Ban wanrah ïa ka jingïatylli bad ka jingïaieit hapdeng ki paidbah nongshong shnong bad kum shi bynta ruh ban lehkmen ïa u snem thymmai, ka shnong Mawkhla Mawsyntai mynta ka sngi ka la pynlong ïa ka jingbam khana shnong, kumba ka ju leh shisien shi snem, ha ka jingïalam jong ki longshuwa ki manshuwa ka shnong.
Ï    a kane ka jingbam khana shnong la ïalam da u Rangbah Shnong Bah Singrum Shylla ryngkat ka jingïatrei lang jong ki Seng Longkmie bad ki Seng Samla. La wan ruh ban shim bynta kum u kongsan da u Bah Finingstar Lyngdoh, uba dei u nongshong shnong jong ka shnong, uba la noh synniang ruh da ka song pisa sha ka shnong Mawkhla Mawsyntai.
Haba ai jingkren ha kane ka sngi, u President ka Seng Samla Mawkhla, u Samla Munlibha Kleiñ, u la pynpaw ba ka jingthmu ba kongsan jong kine ki jingïakynduh paidbah ka long ban ai jingïalam ïa ki khun samla ha ka lynti kaba beit, ban kyntiew ïa ka jinglong kawei bad ban khanglad ïa ki ban ngop ha ki jingmyllien kiba sniew kum ki jingdih buaid bad kiwei kiwei ki kam sniew.
Ka Kong Elbina Binong, kum kawei na ki dkhot ka Seng Longkmie, ka la kren halor ka jingïaid lynti jong ka shnong naduh ba la seng ïa ka, ha kaba kam shym la don kano kano ka jingïabishni pihuin hynrei ka shnong ka la kiew sted ha ka ïoh ka kot bad ka bha ka miat jong ki paidbah nongshong shnong lyngba ka jingkyrkhu jong u Blei nongbuh nongthaw.
Na ka liang u Bah Finingstar Lyngdoh haba kren kum u kongsan, u la ai jingïaroh ïa ka bor shnong, ki seng longkmie bad ki samla ba dei lyngba ka jingdon ka jingïatylli bad jingïaieid ki la lah ban pynlong ïa kane ka jingïabam khana shnong hapdeng ki para nongshong shnong.
U la kyntu ruh ïa ki paidbah ba kin dang bteng ïa ka jingïaieit bad ka jingïatylli na ka bynta ban kyntiew ïa ka shnong ka thaw, namar tang lada don ka jingïasngewthuh jingmut bad ka jingïatylli ka shnong kan dang lah ban kiew ha baroh ki liang.
Nalor ka jingïabam khana shnong, la pynlong ruh ïa ki jingïalehkai bapher bapher ba la shim bynta naduh ki samla, ki longkmie bad ki heprit ban pynkmen ïaki nongshong shnong ha kane ka sngi.