Da ka bailutksan ba shi jingim dawa ka FKJGP na ka Sorkar ban siew ia i heprit ba shah bat bording

Mawkyrwat, Jylliew 08: Ka Federation of Khasi Jaiñtia & Garo People’s (FKJGP) jong ka South West Khasi Hills District mynta ka sngi da ka mynsiem jong ka jingsngewkhia bad jingsngewlem halor ka jingjia ba shah bat bording iwei i hep rit ba dang 3 snem iba la duh ïa baroh ar tylli ki kti na Shnong Mawkohphet, South West Khasi Hills District ki la leit ban ïa kynduh markhmat ïa ka Deputy Commissioner, jong ka distrik ban pynsngew ha ka khnang ba ma ka ruh kan shimkhia.
Lah ban kdew ba kane ka jingjia shah bat bording i hep ba dang 3 snem karta ka dei ha ka 21 tarik u bnai Ïaïong, 2022 ha ka por 11 baje mynstep.
Ïa ka jingleit ban ïa kynduh ïa ka Deputy Commissioner, South West Khasi Hills District la lamkhmat da u General Secretary ka FKJGP, South West Khasi Hills District, u Balse Kharbani bad haba kren ha ki lad pathai khubor hadien ka jingleit ïa kynduh ïa ka Deputy Commissioner, u la pynpaw ba kane ka dei hadien ka jingïakren bad kiba ha ïing ha sem ïa kaba na ka liang jong ki ki la buh ïa ki jingkyrpad ba kum ka seng ka dei ban ïarap bad leh ei ei lem halor kane ka bynta.
Mar kumta hi ka seng kam shym la pynslem halor ka jingkyrpad jong kiba ha ïing ha sem ha kaba mynta ka sngi ka 8 tarik u Jylliew, 2022 ki la leit ban pynsngew ha ka Deputy Commissioner ïa ki ar tylli ki mat kiba kongsan ba kum ka khliehduh jong ka distrik kan shim ban pynsngew ha ki bor ba halor kata ha ka sorkar lyngba ka tnad bording ka MePDCL ba ka dei ban ai ne ïarap na ka bynta i hep rit ba dang 3 snem karta da kaba ai ka Life Time Compensation kaba long kaba long ka jingïarap bai bam kaba manla u bnai bad ban ïarap ruh ban buh da ki kti ba shu buh ne ki Artificial Limbs khnang ba ynda ka la heh la san la shai la shi sngi kan long ka jingïarap na ka bynta jong i ban pyndep ïa ki kam.
Namarkata, halor kine ki jingpynsngew u la ïathuh ba na ka liang ka Deputy Commissioner, South West Khasi Hills District ruh ka la kular ba ka sa leh ïa kaba donkam bad shimkhia halor kane ka kam da kaba kan sa phah jingthoh sha ki bor ba halor bad kumjuh ruh ha u Myntri ba dei peit ïa ka tnad bording jong ka jylla Meghalaya khnang ba ma ki ruh kin sa leh ïa kaba donkam kumba la dep ban pynsngew.
Ha kajuh ka por na ka liang ka seng ka la maham ruh ïa ka tnad bording ka MePDCL ba kum kine ki jingjia kim dei shuh ban jia bad ïa baroh ki jaka buh ïa ki transformer ha manla ki shnong ki dei ban da phah ker bha khnang ba kum kine ki jingjia shah bat bording ïa ki khyllung khynnah kin nym don shuh hynrei lada jia biang, ka seng nangne shakhmat kan sa leh ïa kaba donkam.
Ha kane ka sngi la synrang lang ruh da u Working President ka FKJGP, South West Khasi Hills District, u bah D.K. Lyngdoh Nonglait bad kumjuh ruh ki para dkhot jong ka seng.