Khliehriat Iaiong 19 : Kum shibynta ban rakhe ïa ka Azadi Ka Amrit Mahotsav, la pynlong ïa ka Ayushman Bharat Halth Mela, ïa kane ka prokram la khot pynlong hynnin ka sngi da ka ophis jong u District Medical and Health Officer East Jaiñtia Hills District bad la pynlong ha PHC Pamrapaithlu kaba hap hapoh Wapung C&RD Block, East Jaiñtia Hills District.
Ka jingthmu ba pynlong ïa kane ka mela ka long ban ai jingpynshai halor ki prokram bapher bapher jong ka Ayushman Bharat Health and Wellness Centre, ban pynioh ïa ki ID kiba hapoh ka ABDM , kumjuh ruh ban ai mynsiem ïa ki paidbah ban im ka jingim kaba koit ba khiah bad kiwei kiwei.
Haba kren ha ka jingialang, u District Medical Health Officer East Jaiñtia Hills, u Dr D.Shylla, u la ong ba kane ka Health Mela ka long kum ka rynsan ha kaba ki briew ki ioh jingiarap khlem donkam ban siew pisa, u kyntu ïa ki paidbah ba kin sngewbha ban wan sha kum kine ki health mela kiba dei na ka bynta ka koit ka khiah bad ban leit jngoh ïa kawei pa kawei ka stall kiba dei ruh na kiwei kiwei ki tnat ha kaba kin iarap shibun ha kaba iadei bad ka koit ka khiah.
Ka PHN,NHM East Jaintia Hills District, ka kong P.Lywait, ka la ai ïa ka jingkren maitphang halor ki jingmyntoi ba ki paidbah ki ioh na kane ka Mela ha kaba iadei bad ki jingsumar ïa ki jingpang bapher bapher, ka la batai ruh ba ha kane ka camp la pynioh ïa ki digital ID ABDM, Ayushman Bharat, ki don ruh ki doctor specialist kiba sumar ïa ki khmat, ki ENT doctor, ki doctor bniat.
Ha kane ka Mela la wan ban ïa shim bynta da shibun ki paidbah shynrang bad kynthei bad khynnah, kynthup ruh ki nonghikai, ki khynnah skul.
Ha kane ka Mela ki don ki stall ba la shna kyrpang ruh na ka bynta ban leh ïa ki registration, kiba leh ïa ki registration NCD , kiba leh TB Screening, kiba injek covid, kiba leh councelling.
Ki tnat sorkar kiba la wan ban ïa shim bynta lang ha kane ka Mela ki kynthup ka tnat District Agriculture Officer and District Horticulture Officer, Social Welfare Department, ICDS bad ka ophis jong u Food and Safety Officer, East Jaiñtia Hills District, Khliehriat.
Ha kane ka Mela, ki la don haduh 380 ngut kiba ioh jingmyntoi ha ka check up bad kumjuh ruh ki la don haduh 204 ngut kiba la ioh ïa ki card kiba dei ki Digital/Unique Health ID, kumjuh ruh ka Ayushman Card la ai sha ki lai ngut ki nongioh jingmyntoi, 24 ngut ki la leh ïa ka injek covid-19, la ailad ruh bad pynlong ïa ka jingiatai nia ne ka Group Discussion hapdeng ki khynnah skul, la ai jingpynshai ruh halor ka rukom bam ïa ki jingbam kiba tei ïa ka met khamtam ha ka por ba ar met bad ruh la pynshai halor ka jingdonkam ka jingnang jingstad.
Kiba la ïa don ryngkat ha kane ka jingpynlong ïa ka Mela, ki kynthup u Block Development Officer Wapung C&RD Block, u T.Shylla, ka District Immunization Officer I/c, East Jaintia Hills District, ka Dr. (Mrs) N.P. Suchiang, ka DEIC Manager, East Jaintia Hills District, ka Dr. Handaka, ka District Social Welfare Officer, East Jaintia Hills District, ka kong R.Pasah, Dr. W. Bamon, Sub-Divisional Medical and Health Officer, East Jaintia Hills District, Khliehriat, bad ka Dr. (Ms). R. Suchiang, Medical and Health Officer, I/c Pamra- Paithlu PHC, East Jaintia Hills District bad kiwei kiwei.
