Mawkyrwat, Rymphang 13: Ka Ophis jong u Deputy Commissioner, South West Khasi Hills District, Mawkyrwat, lyngba u District Planning Officer, South West Khasi Hills District, Mawkyrwat ka la pynlong ïa ka prokram pynsngewthuh paidbah halor ka Meghalaya Right to Public Service Act, 2020 ha Wahkaji Secondary School, Nolikata, bad ha Jingaiti Secondary School, Nonghyllam kiba hap hapoh ka Ranikor C&RD Block.
Ki jingthmu jong ka Meghalaya Right to Public Service Act (MRPSA), 2020 ki kynthup ïa ka jingpynbiang ïa ki jingshakri katkum ka por ba la buh hapoh ki por ba la buh, ban pynskhem ïa ka jingkitkhlieh jong ki ophisar ba la jied na ka bynta ban ai jingshakri kiba biang; ka jingkyntiew ïa ka jinglong kaba shai bad kaba thikna ha ki kam sorkar; ka jingai ïa ka rukom jingkyrpad na ka bynta ki jingujor kiba ïadei bad ka jingshakri; bad ban pynthikna ïa ka jingpynbiang ïa baroh ki nongtrei Sorkar Jylla bad ki bor synshar paidbah ne ki tnad treikam kiba trei na ka bynta ka Jylla.
Ka aiñ ha kane ka MRPSA ka kynthup ïa ki jingshakri bapher bapher ba la pyntip, ha kaba palat 201 tylli ki jingshakri la pyntreikam ban pynbha ïa ka jingshakri ha kylleng ki tnad ophis bapher bapher ba ki paidbah ki donkam.
Haba ai jingkren ha kane ka jingïalang u Bah F.B. Basan, MCS, Additional Deputy Commissioner, South West Khasi Hills District, Mawkyrwat ula pynpaw ba ka Meghalaya Right to Public Service (MRTPS) Act, 2020 ka ïeng kum ka aiñ mawjam da kaba thmu ban pynthikna ïa ka jingpynpoi ïa ki jingshakri paidbah ha ka por kaba biang sha ki nongshong shnong ka Jylla.
Ula pynksan ïa ka bynta kaba kongsan jong ka jingai jingshakri kaba paka ha ka jingtreikam kaba stet ka ïarap shibun ïa ka jingkyntiew kyrdan ba pura jong kawei ka Jylla ne ka ri ha baroh ki liang.
Ula pynpaw shuh shuh ba kane ka prokram ka long ban pynsngewthuh paidbah ba lyngba kane ka thmu ka long ban pyntip sha ki nongshong shnong shaphang ki jingshakri sorkar bapher bapher, ki por ba la buh jong ki, bad ki hok ba la pynskhem katkum ka aiñ. Ula kdew ba kane ka aiñ ka pynkhlaiñ bad pynsted ïa ka rukom ai jingshakri paidbah da kaba pynlah ïa ki briew shimet ban buddien ïa ka jinglong jong ki aplikeshon jong ki ba la pyntreikam da ki ophis bad ki tnad sorkar bapher bapher. Nalor kata, ka ai bor ïa ki nongshong shnong ban ujor ha ki bor ba halor bad ban ujor ha ki khep lada don ka jingpynslem ïa ka jingshakri. Ula pynpaw biang ba ka jingshakri paidbah kaba paka ka dei ka dak ba kongsan jong ka jingroi bad jingkiew na ka bynta ka Jylla bad ka ri.
Ula pynkynmaw ruh ïa ki paidbah ba lada ki kwah ban leh ïa ki kam bad ki jingdonkam lyngba ka Meghalaya Right to Public Service Act (MRPSA), 2020 ki lah ban leh da ka online kaba long haduh 122 tylli ki tnad treikam bad 33 tylli ki tnad treikam ki bym pat leh online bad haba ki donkam ban leh ki hap ban leit beit beit sha ki ophis jong ki.
U Bah. O.L. Passah uba dei u Superintendent of Fisheries kum u Resource Person ula ai ïa ka jingkren kaba bniah halor ka Meghalaya Right to Public Service (MRTPS) Act, 2020 ba kane ka long kaba donkam haduh katta ban pynjan ïa ka jingai jingshakri paidbah. Ula pyntip ha kane ka jingïalang, ba ka jylla Madhya Pradesh ka dei ka Jylla ba nyngkong eh ha Ri India ban pyntreikam ïa kum kane ka aiñ.
Ula batai ba ïa kane ka aiñ la thaw ban pynkupbor ïa ki nongshong shnong kiba aplai ïa ki jingshakri ba kongsan da kaba pynthikna ba kin pynpoi ïa ki ha ka por kaba biang khlem da pynslem ïa kita ki jingdonkam lyngba ka jingpynbiang jong ki nongaplai ïa ki kot donkam.
Ula batai bniah ruh halor ka Meghalaya State Services Delivery Commission, ki Aiñ MRPSA, 2021, ka Meghalaya Public Grievance Redressal and Monitoring System (MegPGRAMS), ka hok ban ujor, ki jingshakri ba ïa dei bad ki nongshong shnong, bad ka hok jong ki nongshong shnong ban ïoh ïa ki jingshakri ba la pyntip da ka sorkar.
Ha kane ka sngi la wan ban ïashimbynta da ki khynnah skul bad ki nonghikai jong ka Wahkaji Secondary School, Nolikata, bad ka Jingaiti Secondary School, Nonghyllam, ha ryngkat ki Sordar Shnong bad kiwei ki nongïashim bynta.
