Nongpoh, Risaw 13: Kum ka thong ban kyntiew ïaka pule puthi, u MLA ka Nongpoh u Bah Mayral Born Syiem mynta ka sngi u la leit ban plie paidbah bad aiti syndon da ka Auditorium ba paka sha ka skul Nongtluh Higher Secondary School, Diwon ryngkat ka song pisa ba 2 lakh ban pynbha ïaki kamra klas ha katei ka skul kaba dei kawei naki shlem hikai ba paw ha ka thaiñ Umden.
Ha katei ka sngi ka jingplie ïa katei ka auditorium la sakhi ruh da ka jingdonlang u Bah Hesting Syiem Principal ka skul, Bah W Shylla Chairman ka SMC, u paiem Vincent Syiem, Syiem ka Raid Nongtluh, ryngkat ki nongïalam shnong, ki nonghikai lem bad ki khynnah pule.
Haba kren ha kane ka sngi naka liang u Bah Mayral Born Syiem u la ai ka jingïaroh halor ka jingïaid lynti jong katei ka skul ban ai ka jingnang jingstad kaba paka sha ki khynnah katei ka thaiñ khamtam ki longiing kiba kham duna ka jingioh jingkot.
U la ong ruh ba ka jingplie paidbah ïa katei ka auditorium ka long ka jingkyrkhu bad ka jingmyntoi kaba khraw ïaka skul baroh kawei ba kin ioh ban pyndonkam haki prokram bapher bapher ban lait naka sngi u slap.
Kum u MLA u la kyntu ruh ïaki khynnah ha katei ka sngi ban trei shitom bad minot thop haki jingpule ban kiar naki kam sniew khnang ba kin longbriew man briew haka jingim jong ki.
