Nongpoh, Lber 05: Ka jingap khmih lynti jong kiba bun ki samla ïalehkai ka Ri-Bhoi ban ioh noh kawei ka madan ïalehkai kaba bha kala urlong hadien ba u Myntri Rangbah ka jylla u Conrad Sangma mynta ka sngi u la leit ban buh mawnongrim naka bynta ban sdang shna noh ïaka madan Artificial Turf ha Umbuda hadien ba kum ka shnong kala ai sngewbha ïakatei ka madan ban pynbha ïaka naka bynta ka jingmyntoi jong ki khun samla.
Ïa kane ka madan Artificial Turf la mang pisa kumba 10.93 klur lyngba ka tnad ïalehkai bala wan ruh ban sakhi da ka jingdonlang u Bah Shakliar Warjri myntri ka tnad ïalehkai ka jylla, Bah Mayral Born Syiem MLA ka Nongpoh, Bah Sosthenes Sohtun MLA ka Jirang, Bah Balajied Ranee MDC ka Nongpoh, Bah Victor Rani MDC ka Jirang, Bah B.M Syiem Chief Engineer State Sports Council, Bah CB Syioem Rangbah Shnong Umbuda, ki nongïalam ka RBDSA bad kiwei kiwei ki ophisar naki tnad sorkar, ki khynnah skul lem bad ki riew rangbah na kylleng ka them Ri-Bhoi.
Na ka liang u Conrad Sangma u la ong kumba 700 klur ki project ki dang ïaid mynta haka tnad ïalehkai bad kane ka Artificial Turf ha madan Umbuda kan long kawei naki jingkyrkhu ïaki samla ïalehkai haka district kumba ka Ri-Bhoi kadei kaba paw haka kam ïalehkai bad ïaka kam yn sa sdang noh shen bad khmih lynti hapoh 18 bnai yn pyndep ïa katei ka madan.
U la ong ruh ba kum kitei ki madan yn shna ha kylleng ki jaka bad ki shnong nongkyndong ban kyntiew ïaka kam ïalehkai haka jylla, bad da ka jingtreishitom jong kane ka sorkar ba mynta yn pynmih ïaki Indoor Stadium, ki Synthetic Track, ki jaka lehkai kiba biang da kaba pynbna ruh ba yn shna kawei ka madan ïalehkai kaba biang ha Pahamsyiem.
U Conrad Sangma u la kyntu ruh ïaki khun samla ha katei ka sngi ba kin shim kabu haba wan ki kam pynroi khamtam ki jaka ïalehkai bad ban pyndonkam hok ïaka sap kaba ki don, ym ban ngop haki kam kai bad ki kam sniew kiba lah ban pynjot ïaka jingim tang haka shikhyllipmat bad lyngba katei ka madan bad kiwei kiwei ki project ban dang wan kan kyntiew ïaka kam ïalehkai haka district bad ka jylla baroh kawei.
