Nongpoh, Jylliew 17: Ka seng Khasi Students Union, Umsning Circle mynta ka sngi kala rakhe kynmaw burom ïaka lyngkhuh sngi ïap ba 38 u Biswal Paul Makri (bam kwai ha dwar u Blei) ha madan Umsning, u ba dei u dkhot ba shitrhem jong ka KSU uba la shah siat ïap noh haki pulit CRPF ha ka 17 tarik, Jylliew, 1987 ha Motphran katba ka seng ka dang ïakhun ïaka dawbah jong ka jaitbynriew kiba dei ruh ki snem ka seng ka sdang ban beh naphang ïaki mynder ri kiba la wan ban pynlong kum ka jaka buhai shnong haka ri Khasi.
Ha kane ka sngi kynmaw burom ïa utei u riew shlur, naka liang ka seng kala ïoh ruh ban pynlait paidbah syndon ïaka Ambulance ka ban shakri sha ki paidbah kiba pang ba shitom, khamtam kiba duna ka ïoh ka kot, kaba la thied naka pisa kaba mih naka ka lympung Maitshaphrang Cup bala pynlong da ka KSU Umsning Circle dang shen ha Umsning Patarim.
Ïa ka Ambulance jong ka KSU Umsning Circle la pyllait paidbah da u Samla Donald V. Thabah, General Secretary ka KSU Sengkmie kum u kongsan, haka jingdonlang u samla Ferdynald K. Kharkamni, President ka KSU NKHD, u Bah Rocky Kylla, Chairman ka Umsning Town Dorbar, u Samla Lester Nongbet, President KSU Umsning Circle lem bad kiwei ki riew rangbah ka thaiñ.
