Da ka aiñ ba mana khang dih sikret ha jaka paidbah pynjari ka tnat Pulit ka West Khasi Hills

Nongstoiñ, Naitung 8: Ka jingdih duma, sikret ha ki jaka paitbah kum ha ki jaka ïew, ki dukan sha, Restaurant, Hotel, ha ki kali ba kit ïa ki nongleit nongwan, ka long kaba la kheiñ beaiñ la kham slem. Hynrei haduh mynta ki paitbah nongshong shnong kim pat shym la bud ryntih lait noh tang ha ki kali ha ka por ba ki nongleit nongwan ki don.
Kumta na ka bynta ban khanglad ïa katei ka jingdih duma ha ki jaka paitbah, u Pramod Kumar Project Manager SAMBANDH Health Foundation, mynta ka sngi 8 traik Naitung haba hiar sha Nongstoiñ, u la ïakynduh ïa ki heh pulit ka District bad la pynlong ïa ka jingïatai bniah halor ka jingktah jong u duma ïa ka koit ka khiah lyngba ka video conference ha ka hall jong ka ophis u Superintendent of Police West Khasi Hills. Ha katei ka conference baroh ki heh pulit na baroh ki police station jong ka District ki la ïa don ryngkat.
Ha katei ka video conference la wan ban ïa shim bynta lang da ki VDP jong ka shnong New Nongstoiñ bad CNA. Hadien ka conference ki heh pulit ba la ïalam da u bah O.Massar DSP Crime ba la synran lang da u Project Manager ka Health Fondation, ki VDP jong ka New Nongstoiñ, CNA bad kiwei kiwei ki riew rangbah, ki la leit ban pynshai sha baroh ki dukan sha, ha ki jaka paitbah ba ïaid ba ïeng ha surok bad ki la lum lang ruh ïa baroh ki nongñiah kali kamai sor, ban pynshai halor katei ka jingthmu ban pyntreikam pura ïa katei ka aiñ naduh la shai ka sngi saitjaiñ ka 9 tarik Naitung ha baroh kawei ka West Khasi Hills.
Ha kane ka sngi ïa ka jingpynshai sha ki nongshong dukan kiba die duma kyllaiñ, sikret bad ki jait duma ba la shna na ka bynta ban tynsat shyntur ki kynthei kum ki raja, khaini bad kiwei kiwei, la shim da u bah T.S.Mawdoh Officer Incharge jong ka Langpih Border Out Post.
U bah Mawdoh u la pynshai ruh ha ki nongshong dukan kiba die ïa ki duma ba naduh la shai ka sngi, ki dei ban kynmaw ba kin da tah da ki jingthoh kiba pyni ba la khang pyrshah ban dih duma ha ki jaka paitbah bad ïa baroh ki jait duma ki dei ban buh shapoh ha ki jaka bym ïohi paitbah.
Ha kajuh ka por u la pynshai ba ki nongdie dukan kim bit ban die ïa ki kynja duma ha ki khynnah kiba dang hapoh khatphra snem ka karta namar ka long kaba beaiñ. Ha kaba ïadei bad ki jait sikret u la pynshai ba ïa kino kino ki jait sikret ki bym don ïa ki jingthoh kiba la pyni ba ka jingdih sikret ka ktah ïa ka jingkoit jingkhiah yn ym shah shuh ban die.
Ha kaba ïadei bad u duma kyllaiñ pat u bah Mawdoh, u la ong ba haduh mynta ka aiñ kam pat kynthup satia ha katei ka kyndon. Nalor kata u la pynshai ruh ba kino kino kiba kwah dih duma, ki hap ban dih ha ki jaka kiba lait na ki jaka ba la mana bad lada lap ïa kino kino kiba ïaleh pyrshah, kin hap ha ka kuna kaba ar spah tyngka.