Shillong, Rymphang 07 : Ka Sorkar Jylla ka la pynkhreh ban pynlut palat ïa ka 2,500 klur tyngka na ka bynta ban tei ïa ka Administrative City ha New Shillong Township ne ka Nongbah Shillong kaba Thymmai ha Mawdiangdiang.
Haba pynbna ïa kane ha ka jingïalang ba long mynta ka sngi Balang ha Polo, u Myntri Rangbah u Conrad K Sangma ula ong ba kane ka Administrative City ba la thmu ban tei, kan sa sdang paw kam noh shen ha pyrshah ka Assembly ba thymmai ha Mawdiangdiang.
“Kan dei ka project ka ban shongdor palat ïa ka 2,500 klur tyngka kata ban kynthup ïa baroh naduh ka jingpynïasoh surok, jingpynpoi umbam umdih bad ka jngpynïeng ïa ki jingtei bad ïing ophis bapher bapher” ula ong.
U Myntri Rangbah ula ong ba dang shen ula pdiang ïa ki jingthoh bad jingdro ba ïadei bad ka design (jingpynwandur) ïa ka Administrative City bad shen un sa rah ïa kane hakhmat ka jingïalang jong ka Kynhun Myntri.
“Shisien ba ka Kynhun Myntri ka la ai jingmynjur ïa ka design, ngin sa lah ban khot tender ïa ki kam hadien bala dep pyn khreh ïa ki DPR ka ban long haba kut jong ka quarter ba 2 u snem 2024-2025” ula ong haba bynrap ba u kyrmen ba hapoh kane ka samoi ba mynta, ka Sorkar kan lah ban pynkynriah noh ïa ka Secretariat lada ym dei ïa baroh ki Directorate, sha kane ka Administrative City ba thymmai.
Kat kum ka jingong jong u, ka jingthmu hi ka long ban wanrah ïa ka synshar khadar bad ka jingshakri sha ki paidbah hapoh kawei ka tnum lane kawei ka phyllaw khnang ba ki paidbah ki lah ban leit tang shi jaka bad ïoh lut ïa baroh ki jingshakri bad baroh ki jingïarap ba ki donkam. “Kane ka dei ka thong kaba ngi dang pynkhreh” ula ong.
Nalor kane, u Myntri Rangbah ula pyntip ba ka Sorkar kala dep ruh ban mang pisa ba 100 klur tyngka ban tei ïa lai tylli ki surok kiba lam sha ka Administrative City ba thymmai, ïa kiba la buh mawnongrim dang shen.
“Ki tender kila mih bad ki kam ki dei ban sdang noh hapoh kine ki khyndiat bnai. Ngi khmih lynti ba hapoh u snem mang tyngka ban wan, baroh kine ki lai tylli ki surok kin dep noh khnang ba ki jingtei jong ka Secretariat ruh kan ïaid wut wut” ula ong.
