Shillong, Rymphang 10: U Myntri ka kam jngohkai u Timothy D Shira ula pynbna ïa ka jingthmu ban kyntiew ïa ka kam jngohkai ha ka jylla, da kaba pynleit jingmut ha ka ban kyntiew ïa ki jingtei ïa ki jaka sah kiba biang khamtam ki hotel kiba heh.
U Myntri ula pyntip ba lashai ka sngi kan sa don ka jingïalang ban aiti ïa ka jaka ha Tura, ïa kaba la ju tip mynshwa kum ka Polo Orchid, sha kawei ka kynhun pynïaid Hotel kaba nabar ri ban pynkylla sha ka 5-star hotel.
“Ka sorkar ka dang pyrshang ban leh bun kiei kiei ban kyntiew ïa ka kam jngohkai ha ka jylla Meghalaya baroh kawei” la ong u Shira haba ïakren bad ki nongthoh khubor hynne ka sngi baar.
Ka projek jong ka hotel kan kot ia kumba 40 Klur tyngka ïa kaba yn tei ha ka jaka kaba 1 haduh 2 akar da kaba ïatreilang bad ka kynhun shimet.
U Shira ula pynpaw ruh ïa ka jingthmu ban kyntiew ïa ka jingpynïasoh ha ka leit ka wan haba kdew ba ka kad liengsuiñ kaba jan tam ka dei jongka Guwahati, hynrei ka Baljek airport ka ban sa wan, kan ïarap ha ka ban pynduna ïa ka jingleit sha Tura da 30 Km.
Kiwei pat ki projek ki kynthup ïa ka 23 klur tyngka ka Tourist Lodge ha Siju bad ka 23 klur tyngka ka Convention Center ha Resubelpara.
Nalor kane, yn kyntiew ruh ïa ka Mondalgre ha ka jinglut ka ban kot 23 klur tyngka.
U Shira ula banjur ïa ka jingdonkam ban ïasnohkti lang ki shnong ki thaw ha ka ban kyntiew ïa ki jingtei ha ka kam jngohkai bad ka ai nuksa ba ka la don ruh ka jingpyrshang ha ka Nokrek Biosphere ha kaba ki nongshong shnong ki la shim ïa ki sienjam ban khmih ban peit ïa ka jingkhuid jingsuba.
“Ka shnong ka thaw mynta ka la shimkhia bha ban pynïaid ïa ka. Ki lah dep sam ïa ki notis ba ym shah ïano ïano ruh ban bret ïa ki niut pathar ha kylleng ki jaka bad ym shah ïano ïano ruh ban leit shabar kat shaba lap ba shem” ula ong bad ka bynrap ba la pynbiang ruh ïa ki jaka leit shabar ban kyrshan ïïa katei ka sienjam.
