Da ka 1st MA 2022 pynkup burom ka KSU Mawlongbah Unit ïa ki samla pule

Mawkyrwat, Jymmang 09: Kum shibynta ban ai kyntiew bad mynsiem ïa ki samla jong ka dong ka thaiñ ha kaba ïa dei bad ka kam ïalehkai bad kumjuh ruh ha ka liang ka pule puthi, ka KSU Mawlongbah Unit bad ka KSU Ranikor Circle ka la ïoh ban pynlong ïa ka lympung ïalehkai ka 1st Maitshaphrang Knockout Futsal Tournament 2022 bad da ka 1st Maitshaphrang Award (MA) 2022 ïa ki samla pule ha shnong Mawlongbah, South West Khasi Hills District.
Haba phai ha ka lympung ïalehkai, ka la long ka jingïalehkai kaba shit bad sngaiñ bha da ka jingwan ïashimbynta ki 8 tylli ki kynhun ha kaba ka Mawlongbah Football Team ka la long ka lahduh ha kane ka lympung jong ka 1st Maitshaphrang Knockout Futsal Tournament 2022 da kaba ka la ïoh ban pynliem ïa ka GS team da 3 – 1 kol ha ka jingïakhun ha ka phainal.
Ha ka jingsam ïa ki khusnam ne jingpynkup burom da ka 1st Maitshaphrang Award (MA) 2022, ka KSU Mawlongbah Unit ka la ïoh ban sam sha ki san ngut ki samla pule kiba la pass bha ïa ki egsam jong u snem 2022 bad kane ka jingpynkup burom ka long ruh kum ka dak ne kum shibynta ban ai mynsiem shuh shuh ïa ki samla pule jong ka dong ka thaiñ khnang ba kin ym pynkut noh tang shiteng por ïa ka jingpule jong ki.
Ïa ka lympung jingïalehkai la ïoh ban plie da u samla Raymon Kharjana, Education Secretary jong ka KSU Central Body bad ha ka jingkren lyngkot jong u u la pynpaw ka jingaikhublei na ka bynta ar tylli ki kynhun kiba la poi sha ka phainal bad ai ba ka jingïalehkai jong ki kan pynitynnad ïa ki nongpeit namar ha ka jingïaleh ka don kaba jop bad ka ban shah rem noh. “Kaba jop kan dang ïai ïa khun tyngeh ha ki sngi ki ban sa wan bad kaba shah rem ruh kam dei ban duh mynsiem hynrei ka dei ban don ka thong bad jingtrei shitom ha ki lympung ki ban sa wan khnang ba kan jingthmu ban poi sha ka thong kan long kaba seisoh”, ong u samla Raymon Kharjana.
U la pynkynmaw ruh ba ka jingthmu jong ka seng ban pynlong ïa kum kine ki lympung ka long ban teh song bad ban pynïatylli lang ïa ki samla jong ka dong ka thaiñ bad khamtam eh ban wanrah ïa ka jingïasngewjan iwei ïa iwei pat. Ha kajuh ka por u la ai khublei ruh ïa ka KSU Mawlongbah Unit ba kan nangïaid shaphrang ban pynlong ïa kum kine ki jaid prokram bad ban ai ruh ka jingshakri kaba janai ha ka imlang ka sahlang, ka ri bad ka jaidbynriew hi baroh kawei.
U samla Marconi Thongni, Assistant Finance Secretary jong ka KSU South West Khasi Hills District ha ka juh ka por kum u President jong ka KSU Ranikor Circle ha ka jingkren jong u u la ong ba lyngba kine ki ar tylli ki prokram kan long da shisha ka jingai mynsiem na ka bynta ki samla jong ka dong ka thaiñ Ranikor ba lyngba ka jingïalehkai kin nang lah ban sei ïa kita ki sap ki phong ba ki ki don bad ba kin nanglah ban mihkhmat ïa ka shnong ka thaw, ka distrik, ka jylla bad ka ri ruh kumjuh.
Ha kaba ïa dei bad ki samla pule pat, u ai khublei ïa ka KSU Mawlongbah Unit ba lyngba kane ka sngi kan long ka jingaimynsiem ïa ki namar ka jingnang jingstad ha kine ki sngi ka long kaba donkam haduh katta katta. U la pynkynmaw ruh ba ki samla pule ha kine ki sngi ki la hap ban ïa khun tyngeh ban ïoh ban rung ne ban bteng ïa ki jingpule nangne shakhmat lyngba kawei na ki jingïaleh egsam ba ka sorkar India ka la pynmih ka ‘Common University Entrance Test’ (CUET) ha kaba kum ka seng ruh hadien ka jingpynmih ka la pynpaw ka jingsngewkhia namar kane ïoh kan dei kawei na ki jingïuh roit ïa ki rit paid kum ka jylla jong ngi bad kan sa long ruh kawei ka daw ba ki samla pule kin sa ieh noh noh tang shiteng por.
Na ka bynta ka shongsuk shongsaiñ pat u la ong ba kum ka KSU ka la leh shibun ki kam ha ki jaka khappud ruh ban tehlakam ïa ka jingwanrung tuh jong ki briew kiba nabar ka ri bad bar jylla ruh da kaba ong ba ha ka liang ka synshar khaddar kum ki shnong ki thaw kim dei ban ai wai ha kiwei pat ki jaidbynriew hynrei dei ma ngi hi kiba synshar bad pynïaid ïa ka khyndew ka shyiap khnang ba ka pateng ka ban wan kan nym don hapdeng ki jingeh.
U samla Marconi Thongni ula ai ruh ka jingkitbok kitrwiang na ka bynta ki ‘rangïalehkai jong ki ar tylli ki kynhun ba kin sa ïalehkai bha khnang ba kin poi sha ka thong jong ka jingjop.
Ha kane ka sngi la ïadonlang u samla Dostarwell Kharlyngdoh uba dei u Finance Secretary KSU South West Khasi Hills District, u Secretary Shnong jong ka Mawlongbah, ki longkmie jong ka shnong lem bad kiwei kiwei de ki paidbah ha ryngkat ki dkhot jong ka KSU Mawlongbah Unit.