Da ka 10K Independence Day Run yn pynlong ka Sohra Civil Sub-Division bad ka Sohra SA ha ka 15 tarik

SOHRA, Nailar 07: Ka Office jong u Sub-Divisional Officer, Sohra Civil Sub-Division ryngkat bad ka Sohra Sports Association ka la pynbna ba kan pynlong ïa ka jingïakop mareh thong kaba la ai kyrteng da ka “10K Independence Day Run 2025” kum shibynta ban rakhe ïa ka sngi laitluid mynta u snem 2025 ha ka 15 tarik u Nailar, 2025.
Ka Jingïamareh kan sdang ha ka por 6 baje mynstep na Maraikaphon Football Ground, Sohra bad kan kut ruh ha Maraikaphon.
Kiba lah ban ïashimbynta ki long kumne: Ki shynrang bad ki kynthei kiba hap ha ka rta kaba 18 haduh 35 snem, kumjuh ka kyrdan na ka bynta ki nongmareh shynrang bad kynthei kiba hap ka rta kaba 35 snem shaneng.
Kiba lah ban ïashimbynta kin long tang kito kiba la dap 18 snem shaneng bad kiba dei kiba shong ba sah hapoh jong ka Sohra Civil Sub-Division.
Kiba don jingthmu ban ïashim bynta ha kane ka jingïakop mareh kin hap ban wanrah ïa ka EPIC Card kum ka jingpynshisha.
La pynkhreh ruh ban sam da ka khusnam pisa sha kiba jop. Ka por ba khatduh na ka bynta ka jingpynrung kyrteng kan long ha ki 11 haduh 13 tarik u Nailar 2025 ha Conference Hall jong u Sub-Divisional Officer, Sohra naduh ka por 11 baje mynstep haduh ka por 4 baje janmiet.
Kumta na ka liang jong ka Office jong u Sub-Divisional Officer, Sohra Civil Sub-Division ryngkat bad ka Sohra Sports Association ka khot bad wer ïa baroh ki nongshong shnong jong kane ka thaiñ ban wan ïa shimbynta sha kane ka jingïakopmareh Thong.