Da 5-1 kol pynliem ka Rangdajied ïa ka Nongthymmai ha ka SPL

Shillong, Lber 11 : Ka Rangdajied United FC ka la pynkut ïa ka samoi ïalehkai jong ka ha ka lympung Shillong Premier League 2024 da kaba pynliem ïa ka Nongthymmai SC da 5-1 kol ha madan ïalehkai SSA ha madan First Ground, Polo ha kane ka sngi Nyngkong.
Ïa ki kol jong ka Rangdajied la ïoh ban thep da u Mebanaibok Kharbudnah ha ka minit kaba 40, nangta u Pasborlang Khonglikong uba la ïoh ban thep ha ka minit kaba 43 bad 64 katba u Freddy Jyrwa pat u la ïoh ban pynkhih jar ha ka minit kaba 54 bad 69 jong ka kylla miet.
Na bynta ka shi kol ïa ka Nongthymmai pat la ïoh ban thep da u Michaelson Kurbah ha ka minit kaba 86 jong ka kylla miet.
Ka Rangdajied ka la pynthikna ba kan don ha ka kyrdan kaba lai katba ka Nongthymmai pat kan hap ha ka kyrdan kaba 9 jong ka miej ïa khein point.
Kumba ka long hi, ka Nongthymmai kan hap ban hiar sha ka kyrdan First Division ha ka samoi ban wan. Ha kane ka lympung ka la pynkut da kaba jop lai sien, ïakhaid arsien bad rem 13 sien bad kut da ki 11 point. Katba ka Rangdajied ka la pynkut da kaba jop 11 sien, ïakhaid arsien bad rem san sien, kaba pynlong ïa ka ban kamai 35 point.
Haba phai sha ka jingïakhun ha kane ka sngi, kaRangdajied kam shym la sdang da ka kynhun kaba khlaiñ tam naba u coach ka kynhun u Aibanjop Shadap u la ailad bad tynjuh da ki katto katne ki rangïalehkai jong u kiba ym kham ïoh lad ban mih madan bad kumta ka la kham shipor ïa ka kynhun ban pynpra ïa ka kut jong ka Nongthymmai.
Kane ka dei ka jingïalehkai kaba khatduh eh jong ka Shillong Premier League bad kumta kam shym la don satia kano kano ka jingktah ïa ka miej khein point.
Hynrei ka jingpynkut ïa ka samoi ïalehkai kan don ka jingktah kaba khraw bha namar ka jingïakhun hapdeng ka Mawlai SC kaba ju bat ïa ka nam lahduh pyrshah ïa ka kynhun jongka Shillong Lajong kaba don ha ka kyrdan kaba ar, ban ïa knieh ïa ka nam lahduh. Kane ka jingïakhun kaba la khmih lynti ba kan long kaba shongshit bha kan long ha ka sngi Saitjaiñ ha ka por 5:30 baje janmiet.