Shillong, Rymphang 14: Ka Shillong Lajong FC ka la thep saw tylli ki kol ban pynjemkhnap ïa ka Sreenidi Deccan FC bad ban khur pura ïa ki lai poiñ ha ka jingïakhun jong ka I-League 2024-25 ha madan First Ground – SSA Stadium hynne ka sngi Thohdieng.
Ha kane ka jingïalehkai u Marcos Rudwere Genar Silva u la pynkhihjar ar kol da kaba thep ïa ka penalty ha ka 41minit bud sa ka kol ha ka 72 minit. Kiwei pat ki kol la thep da u Kenstar Kharshong (88′) bad u Renan Paulino de Souza (90’+3P) kaba la pynthikna ïa ka kynhun ban khur shalade ïa baroh lai point bad ban jam sha ka kyrdan ba san.
Haba phai sha ka jingïakhun, watla ka jingkyrshan kaba radbah na ki nongkyrshan jong ka Lajong hynrei dei ka Sreenidi Deccan kaba la synshar bun shah ïa ka bol ha ka kylla step, da kaba tehlakam ïa ka jingïalehkai ha pdeng madan watla ka khlem shym la ïoh ban thaw ïa ki lad ba paka ban pynkhihjar.
Katba ka Lajong kaba ïalehkai hala ïing, bunsien ka pyndonkam da kaba pynkloi pynrung bol shakhmat ban wanrah jingma ïa ki bak jong ka Sreenidi.
Ha ka minit kaba 40, ka Lajong ka la ïoh ban pynïakhlad ïa ka jingïakhaid lyngba ka penalty. Kane ka la urlong hadien ba u Phrangki Buam u la shah pynur noh ha u rangapkol jong ka liang pyrshah, u Aryan Lamba hapoh phyllaw kol. U Marcos Rudwere u khlem shym la pynsepei ïa kane ka kabu, bad pynkhih ïa ka kol ban buh hakhmat ïa ka kynhun.
Ka Lajong ka la jan ïoh ban pynjlan ïa ka kol haka 70 minit, hynrei ka jingpyrshang jong u Daniel Gonçalves ban thep da ka khlieh ïa ka bol ba la pashat na ka corner kick ka la lait sharud. Tang katto katne minit ka Lajong ka la ïoh biang ïa ka corner kick. Ha kane ka por, u Gonçalves, u la pyndei tiak da ka khlieh ïa ka bol ban pynhap ha jaka ba don u Rudwere, uba la khyrwit jlang ban thep ïa ka kol kaba ar na bynta ka Lajong.
U Kenstar Kharshong u la pynbud ïa ka kol kaba lai ha ka minit kaba 88, kaba u la thep lyngba ka bol pashat naka corner kick. Ka jingsohsat ka la nangjur ïa ka Sreenidi Deccan ha ka khyllipmat shuwa ban kut, hadien ba la pynïoh biang sa kawei ka penalty na bynta ka Lajong. U Renan Paulino u la pynrung jlang ïa kane ka penalty ban pynlong 4 kol bad khur pura ïa ki 3 point na bynta ka Lajong.
Kane ka namjop ka la kyntiew ïa ka SLFC sha ka kyrdan ba san ha ka miej hadien 14 tylli ki jingïalehkai da kaba kamai 22 point. Katba ka Sreenidi ka shong ha ka kyrdan ba khyndai ryngkat ki 16 point.
Ka Lajong mynta kan don ha lynti na bynta hynriew sien lynter ki jingïalehkai shabar nala ïing, da kaba sdang nyngkong ïa ka Dempo SC ha ka 19 tarik Rymphang ha Goa.
