Da 4-0 pynliem ka Rangdajied ïa ka Malki, nang jan sha ka jingïaknieh nam lahduh

Shillong, Nailur 04 : Ka Rangdajied United FC ka la nang jan sha ka thong ban knieh nam lahduh ha ryngkat ka Mawlai SC hadien ba ka la pynliem da 4-0 pyrshah ïa ka Malki SC ha ka jingïalehkai ha ka sngi Saitjaiñ ha madan Third Ground, Polo jong ka lympung ïalehkai OC Blue Shillong Premier League 2021-22.
Ïa ki saw kol la thep da u
Dibormi Kassar uba la thep ar kol (29, 61), u Knerktilang Buam (77) bad u Raikutshisha Buam (89′) ki thep mar shi kol ha kaba ka Rangdajied ka la khur 21 point.
Haba mih madan ha katei ka sngi, ka Rangdajied United ka dang kamai 18 poiñ bad don ha ka kyrdan ba lai, katba ka Malki ka don ha ka kyrdan ba hynñiew da kaba kamai hynñiew poin. Ha ka jingïalehkai kaba la long ha ka 2 tarik Naitung kitei ki ar tylli ki team ki la ïakhaid da 0-0. Ka Rangdajied United FC ka ïaryngkat poiñ ryngkat ka Langsning FC hynrei ka don ha ka kyrdan ba lai katba ka Langsning ha ka kyrdan ba ar na ka jingïapher thep kol.
Haba phai sha ka jingïalehkai, u Kassar uba dei u rangïalehkai pdeng uba khlem ïohvan thep kol naduh ba sdang jong ka samoi, hynrei ha katei ka jingïalehkai u la ïoh ban plie pyrda nyngkong da kaba sangah da ka khlieh kaba la wan lyngba ka bol ba la shut da u Donboklang Lyngdoh ha kaba ka jingïalehkai jong ka kylla step ka Rangdajied ka la lamkhmat da 1-0 kol.
Haba wanphai sha ka kylla miet, ka Rangdajied ka la nang ñion sha ka kut jong ka Malki bad dei ha ka minit ba 61 u Kassar u la ïoh ban thep ïa ka kol kaba ar da kaba khyrwit na jngai ka dieng kol. Watla u Rihoklang Khongjoh rangap kol ka Malki u la pyrshang ban kyrda hynrei ka bol ka la rung beit jlang shapoh kol.
Lyngba kitei ki ar kol ka la nang ai mynsiem ïa ka kynhun ha kaba ka Malki kam shym la ïohlad ban pynkhih jar. Da ka jingïapashat bad pyllait bol bha, u Knerktilang Buam u la ïoh ban thep ïa ka kol kaba lai na bynta ka Rangdajied ha ka minit ba 77 jong ka jingïalehkai. U Knerktilang u la thep ïa katei ka shi kol napoh box hadien ba u kapten ka Malki u Khrawkupar Tamu u la pyrshang ban pyllait ïa ka bol da kaba sangah da ka khlieh hynrei u Knerktilang u la ïoh ban pyndei da ka kjat. Ka Malki ka dang mut ba kadei ka foul hynrei u referee u khlem put satia ha kaba u Knerktilang u la ïoh ban thep da kaba suk shapoh kol.
Ka jingïalehkai ka la nang ïaid shakhmat bad ka Rangdajied ka la nang ïakhun tyngeh khlem da ailad ïa ki rangialehkai ka Malki ban tur sha ka kut jong ka. U Raikutshisha Buam uba la rah ïa ka bol shakhmat khlem pynlehnoh ei u la thep beit jlang shapoh kol ha kaba ka Rangdajied ka la ïoh ban thep saw kol bad kadei ruh ka sien ba nyngkong ban jop da saw kol ha ka OC Blue SPL 2021-22.
Haba phai sha kawei ka liang, ka Malki ka khlem lah ban pyndep ha ka liang ka thep kol ha katei ka jingïakhun watla ka la ïoh ka kabu kaba nyngkong ha ka jingïalehkai ba dang ïaid shi minit hynrei u Khrawkupar Nongdhar, bad ka la mad nam rem ba khyndai sien bad kadei ruh ka sien ba san ba ka Malki ka la shah thep saw haduh san kol shaneng ha ki jingïalehkai.
Katkum ka jingpynbeit jong ki nongpyniaid ba ka jingïalehkai jong ka lympung SPL kan bteng biang ha ka 8 tarik Nailur ha kaba ka Nangkiew Irat SC (13 point) kan aireng pyrshah ïa ka Shillong Lajong FC (11 point) kata ban ïakhun ban kiew sha ka kyrdan ba san. Ha katei ka jingïalehkai ka kynhun kaba jop kan pynthikna ruh ïalade ban lait na ka jingshah pynhiar kyrdan.