Da 4 – 0 kol jop ka Starboys FC ïa ka Mih-Nala-Ïing FC ha ka GJCF Tournament 2024 ha Nonglang

Mawkyrwat, ‘Naiwieng 04: Ka Starboys Football Club mynta ka sngi la jop pyrshah ïa ka Mih-Nala-Ïing Football Club da 4 – 0 kol ha ka lympung ïalehkai kynjatbol jong ka Golden Jubilee Celebration Football Tournament 2024 ba la pynïaid da ka Nonglang Sports Club ha Madan Pyndenïewlyngdoh, Nonglang, South West Khasi Hills District.
Ka jingïalehkai ha kane ka sngi ka la long kaba itynnad bha ha kaba ka Starboys FC lyngba u Roystarman Myrthong ula ïoh thep ïa ka kol ba nyngkong ha ka minit ba 17 bad haduh bakut jong ka kyllastep ka Starboys FC ka tam 1 – 0 kol ïa ka Mih-Nala-Ïing FC.
Nangta, haba wan phai biang ha ka kyllamiet, ka Starboys FC lyngba u Donkupar Lyngkhoi u ba la ïoh ban thep biang ïa ki lai tylli ki kol kata ha ka minit ba 51, 55 bad 72 ha kaba lyngba kine ki kol ka la biang pura ïa ka Starboys FC ba kan long ka lahduh da kaba tam noh da 4 – 0 kol pyrshah ïa ka Mih-Nala-Ïing FC.
Ïa ka nam u nongïalehkai ba tbit tam mynta ka sngi la ïoh rah da u Donkupar Lyngkhoi ha kaba ïa ka khusnam la sam da u President jong ka Nonglang Sports Club, u bah Syntarlin Snaitang.
Na ka liang ka Nonglang Sports Club ka pyntip ruh ba ka jingïalehkai kaba bud kan sa long ha ka 08-11-2024 hapdeng ka Sohkhyllam Sports Club pyrshah ïa ka Ryntiehlang Football Club ha ka por 2 baje nohphai sngi hapoh ka Madan Pyndenïewlyngdoh, Nonglang, South West Khasi Hills District. Kane ka dei ka kyrwoh na u Secretary Nonglang SC, u bah Kordorlyne Kharlyngdoh.