Shillong, Ïaïong 02: Ka Nokrek Tigers kala lah ban ïalehkai bha ha ka liang ka ap kol ha kaba kala pynliem da 34 ron pyrshah ïa ka Umiam Eagles ha ka jingïakhun kaba hynriew jong ka lympung ïalehkai Senior Men Challengers Cup ba pynïaid da ka Meghalaya Cricket Association (MCA) ha ka sngi Satjaiñ.
Hadien ba kala jop ïa ka jingkynting pisa kala kam ban tied nyngkong, ka Tigers kala shah pynkhyllem lut ki wicket bad kamai tang 165 ron hynrei ka kynhun ba la ïalam da u Sylvester Mylliempdah kum u kapten ka khlem ailad ïa ki rangtied ka Eagles bad kala siew kylliang da kaba pynkhyllem lut baroh ki wicket da kaba kamai tang 131 ron.
Ka jinglong jingman jong ka suiñbneng kala kham ailad ïa kane ka jingïalehkai, bad ka Umïam Eagles ka la lah ban kawang bol bha da kaba pynhap ïa ki wicket jong ka Nokrek. U Raj Biswa u rangkawang bol spin uba dei ruh u kapten u la khur haduh 4 wicket marwei bad ai kamai 40 ron, uba la ïoh ruh ban pynhap ïa ka wicket u Anish Charak uba dei u rangtied ba kamai bun ron da 19 ron na bynta ka Nokrek Tigers.
Hynrei u paralok jong u, u Rajesh Tati, uba la kamai 11 ron u la lah ban ïarap ïa ka kynhun ban kamai 56 ron shwa ba un shah pynhap wicket lyngba ka stumping ha u Wallam John L Kynshi ba la kawang bol da u Biswa.
U Krishna Thapa (23) udei sa uwei pat u rangtied uba la ïarap kamai ron na bynta ka kynhun, katba kiwei pat kiba la khur wicket na bynta ka Umïam Eagles ki kynthup ïa u Lakhan Singh u ïoh 2 wicket ai kamai 30 ron, u Sengchim Momin u ïoh 1 wicket ai kamai 8), Morningstar Khongwir 1 wicket ai kamai 9 ron, Rahul Shah 1 wicket ai kamai 16 ron bad u Aditya Singhania u ïoh 1 wicket ai kamai 31 ron.
Ka jingkamai 165 ron kam pat biang na bynta ka kynhun kaba la pynlong ba kan ïalehkai bha ha ka liang ka kawang bol. Namar ka inning kaba sdang kala neh tang khyndiat over, ka Eagles kala sdang ban beh ïa katei ka ron bad kala neh wicket ha baroh ki san over shwa ka jingsangeh bamja sngi.
Ka jinglah ban kamai ron ha kaba sdang u Biswa uba kamai 19 ron bad u Bamanbha Shangpliang 20 ron, kala bteng biang hadien ka jingsangeh jahthait, hyrnei na ka jinglah ban kawang bol bha ki rangïalehkai ka Nokrek ka Umïam kala shah khanglad ha ka jingkamai ba 38 ron lyngba ki wicket bala ïoh da u Charak uba khur 3 wicket ai kamai 42 ron.
Ka Eagles kala duna kamai ron hadien ba u Sengpan CT Sangma uba khur 3 wicket ai kamai 28 ron u la khur ar wicket ha kajuh ka over bad u Biswa u la shah pynhap wicket noh lyngba ka run out.
Kumta ka Umiam kala kynjoh sha ka 73 ron ha ka jingduh noh 6 wicket shwa ba kan kynjoh sha ka 100 ron hynrei u Donlang Warjri u la shah pynhap wicket noh ha u Charak bad kamai tang 18 ron. U Steve Syiemlieh u ïoh 1 wicket ai kamai 13 ron bad u Ram Gurung u ïoh 1 wicket ai kamai 28 ron na bynta ka Nokrek Tigers.
Watla u la pynlehnohei ïa ar tylli ki wicket ba kynthup ïa kawei kaba u khlem ïoh ban kem bol, hynrei u Tati uba la kamai half-century u la khur ïa ka khusnam Player-of-the-match. Ka Eagles kan mih madan biang ha ka sngi U Blei pyrshah ïa ka Myntdu Lions ha ka por 9 baje mynstep.
Ka Lions bad Tigers kidei ki ar tylli ki team kiba kamai mar 10 point bad don hakhlieh na ka miej kheiñ point hynrei ka Lions ka bat kyrdan ba nyngkong na ka jingïapher ha ka run rate. Kine ki ar tylli ki team kila ïakhun ha ka sngi sdang hynrei na ka daw ka jingpynthut u slap kine ki ar tylli ki team ki ïoh mar 2 point. Haduh mynta ka Umiam ka don ha ka kyrdan ba lai da kaba khur saw point, katba ka Symper Panthers bad ka Simsang Sharks ki dang ap khmih lynti ban ïoh khur ïa ka nam jop.
