Shillong, Rymphang 03 : Ka kynhun ïalehkai jong ka Meghalaya Jujitsu kaba don baroh kumba 22 ngut ki nongaireng hapoh ka lama jong ka Meghalaya School of Martial Arts (MSMA) ka la khur haduh 33 tylli ki takma na ka lympung ïalehkai 1st Northeast Jujitsu Championship kaba long ha Maligoan Stadium, Guwahati ha ka 31tarik Kyllalyngkot – 01tarik Rymphang 2026.
Ha kane ka lympung ïakob ka Meghalaya ka la ïoh ban khur haduh 10 tylli ki takma ksiar, 12 tylli ki takma rupa bad 11 tylli pat ki takma rnong ha ki lai tylli ki jingïakhun ba kynthup ïa ka Newaza, Fighting System bad ka Contact Fighting.
Watla ka Jylla ka la ïoh ban khur haduh 33 tylli ki takma hynrei ka duna pat sa tang khyndiat ban poi ha ka kyrdan kaba lai bad kumta ka la hap ban shu hun noh ha ka kyrdang kaba saw.
Ïa ka nam lahduh ha kane ka lympung la ïoh ban rah da ka Assam bud pat sa ka Arunachal Pradesh ha ka kyrdan kaba ar bad ka Manipur pat ha ka kyrdan kaba lai.
