SHILLONG, Risaw 24: Ka kynhun ki thei ïalehkai phutbol ka Iran, ki la pynthikna ïa ka burom lahduh ha ka Tri-Nation Women’s International Friendly hadien ka jingjop kaba shongkun da 3-0 kol ïa ka Nepal ha Jawaharlal Nehru Stadium ha Shillong ha ka janmiet jong ka sngi Thohdieng, 24 tarik Risaw, 2025.
Kane ka burom, kaba la wan hadien ka jingjop pyrshah ïa ka India da 2-0 kol kham mynshwa, ka la pynlong ïa ka Iran ban jop lynter na ki arsien ïalehkai bad lamkhmat ha khlieh duh da 6 poiñ. Ka India bad ka Nepal kin ïalehkai khatduh ha ka 27 tarik Risaw.
Ka Sara Didar ka la sdang ha kajuh ka rukom kumba ka la leh ha ka jingïalehkai kaba khatduh pyrshah ïa ka India, da kaba mih bujli ha ka kylla miet bad thep ïa ka kol kaba nyngkong ha ka minit kaba 49. Ka kol kaba ar bad kaba lai jong ka IR Iran la thep da ka Zahra Ghanbari (52’) bad ka Shabnam Behesht (57’).
Ka Iran ka la ïoh ban tehlakam bun shah ïa ka bol bad pynïaid hi ïa ka jinglong jingman jong ka jingïalehkai da kaba pynjur ïa ka jingthombor shakhmat, hynrei ka jingskhem ki nongïalehkai ba shadien jong ka Nepal ka la khanglad ïa ka jingpyrshang jong ka liang pyrshah ban ïoh pynkhihjar.
Ka Nepal ka la nang skhem katba ka kylla step ka nang ïaid shakhmat, da ïoh ruh katto katne ki kabu. Watla ka jingpyrshang thep kol jong ki kam shym la long kam, hynrei ka jingïalehkai ha pdeng madan ka long kaba itynnad. Ka 45 minit jong ka kylla step ka la kut khlem don nong lah ban thep kol.
Ki kol ki la sdang ban tuid tang mar ïa bteng ka kylla kaba ar. Ka Sara Didar, kaba la thep ar kol pyrshah ïa ka India ha ka jingïalehkai kaba ladep, ka la pynïakhlad noh ïa ka jingïakhaid da kaba thep ïa ka kol kaba nyngkong ha ka minit kaba 43 bad buh hakhmat ïa ka Iran.
Tang hadien lai minit, ka Zahra Ghanbari ka la pynjlan ïa ka kol lamkhmat da 2-0 lyngba ka free-kick. Nangta ka Shabnam Behesht ka la pynskhem ïa ka jingjop da kaba thep ïa ka kol kaba lai ha ka 57 minit.
