Shillong, Ïaïong 21: Ka Sawmer SC kala bteng ban khur jingjop ha ka lympung ïalehkai First Division Football League ba pynïaid da ka Shillong Sports Association (SSA) hadien ba kala pynliem noh da 3-0 pyrshah ïa ka Smit SC.
Ha ka jingïakhun kaba long ha ka sngi Palei ha madan MFA, Polo, Shillong, ka jingïakhun hapdeng kine ki ar tylli ki team ka long kaba mar ïa biang bor bha, hynrei dei ha ka minit ba 18 u Gamelial kharlyngdoh u la thep ïa ka shi kol na bynta ka Sawmer SC. Da katei ka shi kol, ka jingïakhun ha ka kylla step ka la long kaba ïathnem bha, ha kaba ki rangïalehkai jong ka Smit kila ïakhun tyngeh ban pynphai hynrei haduh kaba kut jong ka kylla step, ka Sawmer kala lamkhmat da 1-0.
Haba wanphai sha ka jingïakhun jong ka kylla miet, watla ka jingïalehkai kala sdang ban kylla ha ka rukom ïapashat bol, hynrei ka Sawmer kaba la ïoh ban thep kol kala ïoh mynsiem bad kaba la nang ai mynsiem shuh shuh kadei ha ka minit ba 76 hadien ba u Dobenstone L Marshillong u la kum thep bakla hapoh kol lajong kaba la pynlong ïa ka Sawmer SC ban lamkhmat da 2-0.
Ka Sawmer kam shym la hun tang da kine ki ar kol hynrei kila nang ïakhun tyngeh bad khlem da ailad satia ïa ka jingpyrshang thep kol ki rangïalehkai ka Smit, ha kaba u Diogo A Khriam u la thep sa ïa ka kol kaba lai ha ka minit ba 83 na bynta ka Sawmer SC kaba la jop syndon da 3-0. Ka jingïakhun First Division mynta ka sngi (22-04-2022) kan long hapdeng ka Umphyrnai SC pyrshah ïa ka Nongrim hills SC ha ka por 3:30 baje jenmiet.
