Shillong, Naitung 06 : Ka Ryntih SC ka la pynliem ïa ka lahduh ka Shillong Lajong FC da 3-0 ha ka lympung ïalehkai OC Blue Shillong Premier League 2021-22 ha ka jingïalehkai ha ka sngi Balang ha madan Third Ground, Polo.
Haba phai sha ka jingïalehkai, ka Ryntih ka la plie pyrda nyngkong ha ka minit ba 20 ba la thep da u Wilbert Marbaniang. Ka Ryntih SC ka la nang ïakhun tyngeh khlem da ailad ïa ki jingpyrshang thep kol ka Shillong Lajong.
Ka Shillong Lajong ka kham lot ha ka liang ba shadien kaba la ai mynsiem ïa ki rangïalehkai ka Ryntih ban ïoh tur khah khah sha ka kut jong ki bad pynsyier bunsien da ki jingkhyrwit thep kol ïa u rangap kol. Ha ka jingïalehkai kaba la sdang ban ïakhaid bha pynban ka Shillong Lajong ka khlem lah ban pyndep ha ka liang ka thep kol kaba la pynlong ïa ka Ryntih SC ban lamkhmat da 1-0 ha kaba kut jong ka kylla step.
Haba waphai sha ka kylla miet, baroh ar liang ki la ïakhun tyngeh bad pynkylla ruh ïa ka rukom ïalehkai naduh ka jingbujli pynmih rangïalehkai.
Ka Shillong Lajong sa shisien pat ka la mad ka jingshah thep kol hadien ba u Aman Ahlawat u la kum pynur bakla ïa u Dawanplielad Myrchiang hapoh box bad u Lyngdoh Nongbri, uba mih madan kum u rangïalehkai shongben uba la shim ka jingbahkhlieh ïa ka penalty khlem da pynsep ei u la pynrung suk ïa ka bol hapoh ka jar, kane kadei ha ka jingïalehkai ba la ïaid 48 minit.
Ka Shillong Lajong ka la pynmih bujli ïa u Suchen da ka thong ban pynkylla ïa ka rukom ïalehkai, hynrei ka khlem lah pat ban pyndep ha ka liang ka thep kol.
Ka Ryntih kaba la thep ar kol ka la ïoh mynsiem bha ha kaba ka la nang ïakhun tyngeh beit triang bad da kane ka rukom ïalehkai, ha ka minit ba 67 u Wilbert Marbaniang u la thep ïa ka kol kaba ar na bynta jong u bad kaba lai na bynta ka Ryntih SC ha kaba ka la khur syndon ïa ka jingjop da 3-0.
Lyngba kane ka nam jop ka Ryntih ka la kiew sha ka kyrdan ba nyngkong na ka miej kheiñ point da kaba khur 9 point bad ïaryngkat point bad ka Mawlai SC hynrei ïapher pat ha ka liang ka thep kol, katba ka Shillong Lajong ka don ha ka liang ka jingshah pynhiar kyrdan kata ha ka kyrdan ba hynñiew.
Mynta ka sngi Palei ka jingïalehkai kan long hapdeng ka Rangdajied United FC (kaba kamai 5 point) bad ka Langsning FC (4 point) ha ka por 4 baje janmiet.
