Da 15 ron pynliem ka Nongmynsong CC ïa ka Royal CC ha ka lympung SCA Cricket League Super Division 2026

SHILLONG, Rymphang 20: Ka Nongmynsong Cricket Club ka la ïoh mad ïa ka jingjop hadien ba ka la pynliem noh da tang 15 ron ïa ka Royal Cricket Club hynne ka sngi Thohdieng ha kawei na ki jingïalehkai jong ka lympung Shillong Cricket League Super Division 2026 ba la pynïaid da ka Shillong Cricket Association.
Hadien ba jop ïa ka jingkynting pisa (toss) ka Royal CC ka la aiti ïa ka liang pyrshah ba kan tied nyngkong, ha kaba na ka liang jong ka Nongmynsong CC ka la lah ba kan kamai 231 ron shuwa ban khyllem noh baroh 10 wiket haki 43 ober.
U Jaskirat s Sachdeva u la lamkhmat ha ka tied da kaba kamai 78 ron naki 99 bol, katba u Ram u la noh synñiang 45 ron naki 57 bol. Napdeng ki nongkawang bol jong ka Royal CC, u Raj Biswa u la khur 4/23 naki 8 ober, katba u Bipin Ray u la khur 2/42 naki 8 ober.
Ha ka jingpyrshang beh jong ka Royal CC ïa ka thong, u Raj Biswa u la kamai 59 ron naki 35 bol, bad u Reshabh Dipak u la tied 50 ron naki 41 bol, hynrei ka kynhun ka la lap ba khyllem noh baroh 10 wiket ha ka por ba ka dang kynjoh 216 ron haki 36.1 ober, bad ka la shah rem noh da 15 ron.
U Jaskirat S Sachdeva, u nongtied ba kamai bun ron tam ïa ka Nongmynsong, sa shi sien u la pynmih ïa ka jingïalehkai ba kyrpang sa ha ka boling, da kaba khur 5/23 naki 9 ober, kaba la pynlong ruh ïa u ban khur ïa ka khusnam Player of the Match. U wei pat u nongkawang bol ba seisoh jong ka Nongmynsong udei u Himan c Phukan, uba la khur 2/48 naki 8 ober.