Jowai, Ïaïong 22: Ka kynhun ïalehkai jong ka West Jaiñtia Police CC kala jop da 131 runs ïa ka Evergreen SC&CC haka jingïalehkai jong ka District Cricket League 2025 bala pynïaid daka West Jaiñtia Hills District Cricket Association (WJHDCA) mynta ka sngi 22 tarik ha Mini Stadium, Khliehtyrshi.
Haba phai sha ka jingïalehkai kala long kaba noh shilliang hapdeng ka West Jaiñtia Police CC pyrshah ïa ka Evergreen SC&CC, ha kaba ka West Jaiñtia Police CC ka la jop haduh 131 runs.
Ïa ka jingkynting toss la jop da ka West Jaiñtia Police CC kaba la kam trai ban tied shuwa. Ka West Jaiñtia Police CC haba wan ban tied nyngkong kala kamai 196 run na ki 35 overs bad liem 7 wicket. U Devention Lyngdoh ula pyni shisha ïa ka sap kum u nongtied da kaba tied marwei 90 runs (khlem out) na ki 79 balls bad u la thlieh ruh lai tylli ki Six (6s) bad shiphew tylli ki Fours (4s).
U Habanjop Khonglah pat ula tied 23 runs na ki 45 balls ryngkat bad iwei i Four (4). U Lodumaitphang Khonglah, nongkawang ball jong ka Evergreen SC&CC u la ïoh ban pynhap marwei 3 wickets na ki 7 overs.
Ka Evergreen SC&CC haka pali ban beh ïa ka thong, ki nongtied jong ka kim lah ban shan ïaka jingtbit jong ki nongkawang ball jong ka West Jaiñtia Police CC bad ki la kyllon uwei hadien uwei bad ki lah ban kamai tang 65 bad duh noh baroh 10 wickets haka over kaba 21.2. U Devention Lyngdoh bad u Bishal M Sangma, ki nongkawang ball jong ka West Jaiñtia Police CC ki la ïoh ban pynhap mar 3 wickets na ki 4 overs. U Devention Lyngdoh u ba tied bun run na ka West Jaiñtia Police CC bad u ba ïalehkai bha ruh ha ka bowling u la ïoh khur ïa ka nam Man of the Match.
Ka jingïalehkai lashai ka sngi Balang 23/04/2025 kan long hapdeng ka Ummulong SC pyrshah ïaka Mowkaïaw CYC naduh ka por 9 baje mynstep.
