Jowai, Jylliew 30 : Ka jingïalehkai phutbol bala tip kum ka ‘5th Debo Shullai Memorial Trophy’ 2nd Division Football Tour-nament 2022 bala pynïaid da ka West Jaiñtia District Sports Association (WJDSA) kaba la long mynta ka sngi 30 tarik ha madan Kiang Nangbah Stadium Jowai.
Haba phai sha ka jingïakhun mynta ka sngi hapdeng ka Mooknor Thadmuthlong pyrshah ïa ka Panaliar kala long kaba ïakhaid bha naduh kaba sdang haduh kaba kut, hynrei ka Panaliar kala ïoh ban pynkhih ïa ka shikol dei ha ka minit ba 4 lyngba u Obram Sumer.
Ka jingïakhun hapdeng kine ki ar kynhun kala nangïaid shakhmat bad kaba la kham itynnad shuh shuh ha kaba ka Mooknor Thadmuthlong kala pynshang ban pynphai ïa katei ka shikol hynrei kam ïoh lad satia tad haduh ba kut jong ka jingïakhun kaba la neh da 1-0 kol.
Lashai ka sngi 01 tarik u Naitung ka jingïakhun kan long hapdeng ka Pynthorlangteiñ pyrshah ïa ka Lion Sports & Youth Affairs ha ka por 3 baje nongphai sngi.
