Da 1-0 pynliem ka Shillong Lajong FC ïa ka Malki SC ha ka Shillong Premier League

Shillong, Naitung 24 : Ka Shillong Lajong FC ka la khur pura ïa ki lai point hadien ba ka la pynliem da 1-0 pyrshah ïa ka Malki SC ha ka lympung ïalehkai OC Blue Shillong Premier League 2021-22 ha ka jingïalehkai ha ka sngi Saitjaiñ jong ka taïew ba lah dep ha madan Third Ground, Polo, Shillong.
Hashwa ban mih madan, ka Shillong Lajong ka don ha ka kyrdan ba hynriew bad ka Malki ha ka kyrdan ba hynñiew. Baroh ar tylli ki team ki kamai mar 4 point hyrnei ka Shillong Lajong ka lamkhmat ha ka liang ka thep kol.
Ka Shillong Lajong mar syn sdang ka la ñion beit sha ka kut jong ka Malki bad ka la ïoh ban pynkhih jar ha ka jingïalehkai ba dang ïaid hynriew minit. Ki rangïalehkai ka Shillong Lajong ki la pashat bol hapoh box bad u Khrawkupar Tamu u la pyrshang ban pyllait bol hynrei ka la poi ha ki kjat u Wadajied Ryngkhlem.
U Ryngkhlem u ba la ïoh bat ïa ka bol u la pynshat bad khlem da pynslem u la khyrwit beit khyrwit beit shapoh kol ha kaba u rangap kol ka Malki u Rihoklang Khongjoh, u la ïoh ban pyndei tiak ïa ka bol kaba la rung shapoh jar.
Ka jingïalehkai ka la nang ïathnem ba haroh arliang, u Tremiki Lamurong jong ka Lajong u la shut ïa ka free kick bad ka bol ka la poi ha u Khongjoh hynrei ki rangïalehkai ka Malki ki la ïoh ban knieh bol noh. U Lucas Syngkli u la ïoh ban khyrwit hynrei ka bol ka la dei noh ïa u dieng kol. U Syngkli naduh ba mih madan u la ïalehkai kum u centre back hynrei ha katei ka sngi u la ïalehkai shakhmat.
Ka jingïakhun haduh ba kut ka kylla step, ka Lajong ka khlem ïoh thep kol bad ka Malki ruh ka la kut tang ha ki jingpyrshang thep kol ha kaba ka Lajong ka la lamkhmat da 1-0.
Ha ka kylla miet, ka jingïalehkai ka la sdang ban thnem biang, ka Lajong ka la nang pynkhlaiñ bad ñion beit sha ka kut hynrei ka la pynlehnoh ei bun tylli ki kabu thep kol. Kumjuh ruh ka Malki ka la ïoh ki katto katne ki kabu hynrei ka khlem lah pat ban pyndep ha ka liang ka thep kol.
Bad haduh kaba kut ka Shillong Lajong ka la khur pura ïa ki lai point hadien ba ka Malki SC ka khlem lah ban thep kol pynïakhaid. Ka Shillong Lajong mynta ka kamai 7 point bad don shadien ka Nangkiew Irat kaba kamai 8 point bad sah sa shisien ïalehkai jong ka leg ba nyngkong.
Ka jingïalehkai Second Leg kan sdang ha ka 3 tarik Nailar ha kajuh ka madan ïalehkai ha Third Ground, Polo, Shillong. Ka jingïalehkai mynta ka sngi Nyngkong kan long hapdeng ka Mawlai SC kaba don ha ka kyrdan ba nyngkong pyrshah ïa ka Rangdajied United FC kaba don ha ka kyrdan ba lai ha ka por 4 baje janmiet.