SHILLONG, Kyllalyngkot 29: Ka RangKynshai CC ka la lah ba kan pynliem noh da 7 wiket ïa ka Young Guns CC ha kawei na ki jingïalehkai jong ka lympung Shillong Cricket League Super Division 2026 jong ka Shillong Cricket Association ba la long hynne ka sngi Balang.
Haba tied nyngkong hadien ba jop ïa ka jingkynting pisa (toss), ka Young Guns CC, ka la shah pynkhyllem noh baroh 10 wiket na ka bynta 187 ron haki 44.1 ober, nangta ka RangKynshai CC ka la hap tang 3 wiket ban kamai 189 ron haki 29.1 ober ban pynthikna ïa ka jingjop.
Ha ka pali tied jong ka Young Guns CC, kiba la lamkhmat ki long u Rudra Singh Rathore, uba la kamai 53 ron naki 75 bol, bad u Angkit Tamang uba la noh synñiang 29 ron naki 68 bol.
Katba ki nongkawang bol kiba kham seisoh jong ka RangKynshai CC ki long u Charm Marbaninag (khur 2/26 naki 7 ober) bad u Ajay Duhan (2/29 naki 9 ober).
Kiba la ïalam ban pynpoi sha ka thong na ka bynta ka RangKynshai ki long u Ajay Duhan, uba la khyrwit haduh 93 ron naki 92 bol, bad u Joydeepan Deb, uba la kamai 68 ron naki 75 bol.
Baroh lai wiket kiba la hap jong ka RangKynshai CC kidei kiba la shah weng da u Girish Ray, uba la ailad tang 40 ron naki 7.1 ober, hynrei ka jingtrei shitom jong u marwei ka la shu long leh noh ei, namar ba ka kynhun ka la shah rem noh da 7 wiket.
Na ka bynta ka jingïalehkai kaba kyrpang ha baroh ki liang, u Ajay Duhan (kamai 93 ron ha ka tied bad khur 2 wiket ha ka boling) u la ïoh ban khur ïa ka khusnam Player of the Match.
