SHILLONG, Rymphang 09: Ka Rangkynsai SC ka la pynliem kput haduh 141 ron ïa ka Sporting CC ha kawei na ki jingïakhun jong ka lympung Shillong Cricket League Super Division 2026 jong ka Shillong Cricket Association (SCA) hynne ka sngi Nyngkong.
Haba tied hadien ba jop ïa ka jingkynting pisa (toss) ka Rangkynsai ka la kamai 294 ron bad hap 4 wiket haduh kaba kut jong ki 42 ober, nangta ka la pynkhyllem noh ïa baroh 10 wiket jong ka Sporting CC tang na ka bynta 153 ron haki 31.4 ober.
La lamkhmat ïa ka Rangkynsai ha ka tied da u Ajay Duhan, uba la khyrwit 121 ron naki 120 bol, bad u Ram Gurung uba la kamai 86 ron naki 57 bol. Katba kiba tyngshaiñ ha ka boling ki long u Adarsh Joshi (8 ober: ailad 29 ron: khur 3 wiket) bad u Ajay Duhan (2.4 ober: ailad 15 ron: khur 2 wiket).
Na ka bynta ka jingïalehkai kaba kyrpang ha baroh ki liang, u Ajay Duhan u la ïoh ban khur ïa ka khusnam Player of the Match.
