SHILLONG, Kyllayngkot 05: Ka Shillong sixers CC bad ka Sportive CC ki la khur jingjop ha ka rukom kaba shongkun ha la ki jong ki jingïalehkai ka lympung Shillong Cricket League 3rd Division 2025 ba la pynlong da ka Shillong Cricket Association hynne ka sngi Nyngkong.
Baroh ar ki kynhun ba jop kidei kiba la shimti ïa ka pali tied ba nyngkong, ha kaba ka Shillong Sixers ka la pynliem kput da 121 ron ïa ka Riatsamthiah CC, nangta ka Sportive CC ka la jop suk da 127 ron ïa ka Jersey king.
Ha ka jingïalehkai ba nyngkong, ka Shillong Sixers CC ka la jop ïa ka jingkynting pisa (toss) bad kam trai ban tied nyngkong. Ka spah ron jong u Sandeep Roy (107 ron naki 47 bol) ryngkat ka jingnoh synñiang kaba 86 ron (40 bol) jong u Meinam Amit Singh ka la ïarap ïa ka kynhun ban buh ïa ka thong kaba 245/4 ron haki 20 ober.
Haba pyrshang beh ïa ka thong ka Raitsamtiah ka la ïohlad ban kamai tang 124 ron bad hap 8 wiket haki 20 ober, kaba la pynlong ïa ka Shillong Sixers ban jop suk da 121 ron, ha kaba u Sandeep Roy u la khur ïa ka khusnam Player of the Match na ka bynta ka spah ron kaba u la kamai.
Ha ka jingïalehkai kaba ar, ka Jersey King ka la jop ïa ka toss bad aiti ïa ka Sportive ba kan tied nyngkong, ha kaba kane ka kynhun ka la lah ban tied pyndep ïa ka 20 ober ba la mang ban kamai 208 ron bad hap noh 8 wiket.
Kiba la noh synñiang bun ron ïa ka kynhun ki long u Jagdeep (73 ron naki 43 bol) bad u Rajdeep (25 ron naki 15 bol). Katba u Raj Biswas jong ka Jersey king u la khur 2/29 naki 4 ober.
Hynrei haba wan ban beh ïa ka thong ka Jersey king ka la shah pynkut noh da tang 81 ron naba khyllem baroh 10 wiket haki 16.1 ober, watla na ka liang u Vivek Sunar u la kamai 25 ron naki 27 bol hynrei ka kynhun ka dang sahdien sa 127 ron ban poi sha ka thong.
U Suraj Sharma, rangkawang bol jong ka Sportive u la khur 3/12 naki 4 ober, hynrei ïa ka khusnam Player of the Matchla khur da u Jagdeep (uba la kamai 73 ron naki 43 bol).
