Shillong, Nohprah 11: Ka Meghalaya ka la donkam kumba 90 minit eiei ban weng noh ïa ki saw ngut ki nongtied ba dang sah jong ka Nagaland bad ban khur ïa ka jingjop da 109 ron ha ka sngi ba saw bad ba khatduh (Day 4) jong ka jingïalehkai plate group ha ka U-19 Cooch Behar Trophy 2025-26 ha madan kriket MCA, Polo.
Ha ka jingpyrshang ban kynjoh ïa ka 375 ban jop, ka Nagaland ka la bteng ïa ka pali tied kaba ar naka 208/6, hynrei baroh ki nongtied ki la shah pynkhyllem noh (all out) na bynta 265 ron, ha kaba u kapten ka Meghalaya u Angkit Tamang u la ïoh ban khur san wiket (5/45). Ban pynkynmaw biang, ka Meghalaya ka la lah ban kamai 312 ha ka pali tied kaba nyngkong shuwa ban pynkut noh ïa ka Nagaland tang na ka bynta 165 ron. Nangta ka kynhun kaba ïalehkai hala ïing, ka la lah ban pynkut ïa ka ka pali kaba ar hynnin ka sngi Balang da kaba kamai 227 ron.
U Angkit ka la ïoh ban khur lai wiket ha kane ka sngi, katba uwei pat la shah pynkhyllem ha u Mewan Kitbok Kharpuri (2/71). Kiwei pat ki nongkawang bol ka jylla kiba la pynhap wiket hynnin ka sngi Balang ki long u Spandana Mark (2/33) bad u Gaurav Jyoti Thakuria (1/43).
Kane ka jingjop ba ka Meghalaya ka la ïoh khur mynta ar sien lynter ka la pynlong ïa u President ka Meghalaya Cricket Association u Nababrata Bhattacharjee ban ai ka jingïaroh. U la ai khublei na ka bynta ka “jinglehkai kaba kyrpang jong ka kynhun ban khur ïa ka jingjop kaba shongkun” da kaba ai khublei kyrpang ruh ïa u Angkit, u Sameer Choudhury (uba la ïoh ban khur 6/40 ha ka pali tied ba nyngkong jong ka Nagaland), u Gaurav Narleng (uba la kamai 127 ron ha ka pali tied ba nyngkong jong ka Meghalaya) bad u Mewankitbok Kharpuri (uba wan kyrdan ba lai ha ka plate group katkum ka jingkheiñ ki wiket ba u la khur – 24 tylli).
“Ka jinglehkai kaba kyrpang ha baroh ki liang na ka kynhun ka pyni ïa ka jingaiti bad ka jingpyndonkam hok ki samla jong ngi ïa ka kyrdan ba ki don bad ka long ka jingkiew kaba ai jingkyrmen na ka bynta ka lawei jong ka kriket ha ka jylla jong ngi,” la bynrap u Bhattacharjee.
Ka Meghalaya ka dang don sa kawei ka jingïalehkai round robin ban ïakhun, ka ban long pyrshah ïa ka Mizoram naduh ka 16 tarik u Nohprah. Kane ka jingïalehkai kan long ha Anand, Gujarat.
Ka jingjop ka Meghalaya hynne ka sngi ka buh ïa ka ha ka kyrdan kaba don jingkyrmen ban ïoh ïa ka jaka ha ka phainal. Ka Nagaland ka la jop ïa baroh lai tylli ki jingïakhun ba la dep bad ka dang don ha ka kyrdan ba-ar da kaba khur 19 poiñ haba nujor ïa ka Meghalaya kaba kamai 18 poiñ, katba ka Manipur ka don ha ka kyrdan ba nyngkong ha ka Group da kaba khur 24 poiñ hadien ka jingjop kaba saw sien lynter. Ka jingshah rem jong ka Meghalaya haduh mynta ka long tang ha ka Manipur ha u bnai ba la dep.
Ka Mizoram ka la shah rem ha baroh lai tylli ki jingïakhun ba ka la ïakhun haduh mynta (kaba saw ka dang ïaid shakhmat), bad la khmihlynti ba kan nym buh jingeh than ïa ka Meghalaya hynrei ka jylla kam lah satia ban kheiñ sting ïa kane ka jingïakhun. Katba ka jingïakhun ba khatduh jong ka Nagaland kan long pyrshah ïa ka Manipur kaba khlem pat shah rem ka ban sdang ha kajuh ka sngi. Tang ka jingjop kan nym lah ban pynthikna ïa ka Meghalaya ban rung sha ka phainal namar ba ka dang hap ban peitngor bha ïa kaei kaba jia hapdeng kiwei pat ki jingïakhun, kaba pynlong ïa kane ka jingïakhun kaba jur bha ha ki lai liang.
