Cooch Behar Trophy 2025-26: Mar 2 wiket khur u Angkit & Apandanka ban kham pynjan ïa ka Meghalaya sha ka jingjop

Shillong, Nohprah 10: Ka Meghalaya ka dang sah sa saw wiket ban jop pyrshah ïa ka Nagaland ha ka plate group U-19 men’s Cooch Behar Trophy 2025-26 hadien ba ka jingïalehkai kaba kyrpang ha ka 45 minit ba khatduh jong ka sngi kaba lai (Day 3) hynne ka sngi Balang ka la pynlong ïa ka kynhun ban nangjan ka jingkyrmen sha ka jingjop.
Da kaba buh ïa ka thong kaba 375 ron ïa ka liang pyrshah ban jop, ka Nagaland ka la ïalehkai husiar bha haba sdang ïa ka pali tied kaba ar jong ka, bad ka la don ka khep ba ka la don jingkyrmen hadien ba kamai 194 ron na ka bynta 2 wiket.
Ka Nagaland ka la muja bha ban mad ïa ki bol spin jong ka Meghalaya bad kane ka la pynlong ïa u Angkit Tamang, u kapten jong ka kynhun, ban wanrah biang ïa ka jingïalehkai ba kyrpang jong u sha ka jingïakhun, ryngkat bad u Apandanka Marak na kawei pat ka tduh katba ka sngi ka la sdang ban sep. Ka jingpynkylla da kaba wanrah ïa ki nongkawang bol pace ka la ai jingmyntoi namar kine ki arngut ki la khur mar ar wiket kaba la buh ïa ka Nagaland ha ka 208/6 shuwa ban pynkut ïa ka sngi. Watla katta, ka Nagaland ka dang lah ban leh eiei ban khur ïa ka jingjop hynrei ki donkam sa 167 ron ha ka sngi ba khatduh mynta ka sngi.
Kham hashwa, ka Meghalaya ka la sdang biang ïa ka pali tied na ka 137/5 bad ka la shah pynkut noh da 227 ron. Haba phaidien, ka Meghalaya ka la kamai 312 ha ka pali kaba nyngkong (1st inning) shwa ba kan pynkut noh ïa ka Nagaland da 165.
U Shyerinlo Thong (47 ron) bad u Tachuye Trakha (62 ron) ki la ïatreilang ban kamai 93 ron na ka bynta u wiket ba nyngkong, katba ka Nagaland ka la sdang ban beh ïa ka thong da ka jingïalehkai kaba khlaiñ. U Gaurav Jyoti Thakuria (1/43) u la weng noh ïa u Shyerinlo nangta u Mewankitbok Kharpuri (1/54) u la ïoh pat ban pynhap ïa u Tachuye. Hynrei ka Nagaland ka la kyntait ban shah rem ha kaba u Jesevilie Dzeyie (39) bad u Aloto Sumi (32) ki la bynrap sa 62 ron na ka bynta u wicket ba lai.
U Angkit u la pynhap noh ïa u Jesevilie ha ka pber kaba 53 bad hadien 8 bol u Apandanka u la leh kumjuh ïa u nongtied ba mih bujli u Samir Ali (1). Nangta u Apandanka u la weng noh ïa u Yashimeren Jamir lyngba ka LBW shuwa ba u Angkit un pyndep ïa ka sngi da kaba pynkhyllem ïa u Aloto.