Shillong, Nohprah 09: Ka kynhun ïalehkai kriket ka Meghalaya ka la ïoh ban bat hi ïa u thied ban synshar ïa ka jingïalehkai plate group jong ka U-19 Men’s Cooch Behar Trophy 2025-26, ha kaba ka kynhun ka la ïoh ban lamkhmat ïa ka Nagaland da 284 ha ka sngi kaba ar ha kane ka jingïalehkai kaba la long ha madan kriket ha MCA, Polo.
U Sameer Choudhury u la long uba kongsan tam na ka bynta shibun kiei kiei kiba la seisoh jong ka Meghalaya ha kane ka jingïalehkai, ha kaba u la khur 6 wiket bad ailad tang 40 ron.
Ka Nagaland ka la sdang biang ïa ka pali tied ba nyngkong (1st inning) jong ka na ka 20/2 bad ka la shah pynkhyllem lut baroh tang na ka bynta 165 ron hapoh shiteng kynta. Kane ka la pynlong ïa ka Meghalaya ban lamkhmat ïa ka kylla ba nyngkong da 147 ron. Hadien nangta, ka Meghalaya ka la shimti ïa ka kylla kaba ar (2nd Inning) da kaba kamai 137 ron bad duh 5 wiket shuwa ban pynkut ïa ka sngi.
Ki nongtied ka Nagaland ki la lah ban pynjlan ïa ka jingshan slem ha ki 10 ober shuwa ba u Yashimeren Jamir un shah weng noh ha u Gaurav Narleng (2/22) da kaba kamai tang 6 ron na ki 51 tylli ki bol. Ka jingwan jong u Shyerinlo Thong, uba la kamai 41 ron na ki 104 bol ka la kham kyntiew ïa ka jingpyrshang jong Nagaland ban beh ïa ka thong.
Kane ka la bteng sa sha u Vizoletuo Zhale (35 ron na ki 38 bol), uba ka jingïatreilang ka jong u bad u Amongti Longkumer (13 ron not out na ki 25 bol) ka la ïarap ïa ka Nagaland ban kiar na ka jingshah pynbuddien ban shimti ïa ka kylla kaba ar ha ka tied (follow-on). Kine ki arngut ki la wan lang ha ka por ba ka Nagaland ka dang kynjoh 116 ron bad khyllem 8 wiket bad la thikna ba ka Meghalaya kan jin da la aiti ïa ka Nagaland ban tied biang lada ka lah ban pynïakhlad noh kloi ïa ka jingïatreilang jong kine ar ngut.
Na ka bynta ka Meghalaya, u Sameer u la weng noh ïa baroh arngut u Shyerinlo bad u Vizoletuo bad sa saw ngut kiwei pat tang haki 13.2 ober. Lait na u Narleng, u Gaurav Jyoti Thakuria (1/31) bad u Mewankitbok Kharpuri (1/50) ki la ïoh ban khur ïa kiwei pat ki wiket na ka bynta ka Meghalaya.
Haba shimti ïa ka pali tied kaba ar (2nd Inning), lai ngut ki nongtied ka Meghalaya ka la pynkut ïa ka sngi da kaba kamai 137 ron bad duh 5 wiket. U Thakuria, u la pynkut ïa ka sngi khlem da shah pynhap na bynta 22 ron ha ryngkat bad u Rudra Singh Rathor (14 not out).
U Medempok Pongen, uba la khur 3/46 ha ka sngi ba nyngkong, u la bteng ban long ka jingma ïa ka Meghalaya da ka jingkheiñ kaba 4/29. U la ïoh ban pynhap ïa u wiket ba nyngkong ha ka over kaba nyngkong eh hynne ka sngi.
Ka jingkyrmen jong ka Nagaland ka shong satang lada ka lah ban weng noh kloi ïa ki nongtied kiba dang sah mynta ka sngi katba ka Meghalaya ka dei ban ïai neh bad ban ym ailad ïa ka liang pyrshah ban wanphai biang sha ka jingïakhun.
