Shillong, Naiwieng 16: Ka sngi ba nyngkong (Day-1) jong ka jingïalehkai plate group hapdeng ka Meghalaya bad ka Sikkim ha ka lympung kriket kaba la tip da ka ‘U-19 men’s Cooch Behar Trophy 2025-26’ ha MCA Ground, Polo, ka la sakhi ïa ka jingïalehkai kaba kyrpang ha ka liang ki nongkawang bol, ha kaba 22 wiket ki la khyllem tang hapoh shi sngi.
Ka Meghalaya ka la jop ïa ka jingkynting pisa (toss) bad ka la aiti ïa ka Sikkim ba kan tied nyngkong, da kaba pynkut ïa ka Inning tied jong ka liang pyrshah tang na ka bynta 76 ron. Watla ka Meghalaya ka lamkhmat ïa ka jingïakhun ha ka Inning kaba nyngkong hynrei ka la ïohlad tang ban kamai 108 ron naba shah pynkhyllem lut ki nongtied ha kajuh ka sngi. Haba wanphai ban tied ïa ka Inning kaba ar, ka Sikkim ka la duh 2 wiket bad kamai 46 ron, ban lamkhmat ïa ka jingïalehkai da 14 ron.
Watla ka jinglong jingman ka suiñbneng ka la paw kumba ka long ka jingmyntoi ïa ki nongtied, da ka jingshai jong ka sngi baroh shisngi, hynrei dei ki nongkawang bol kiba la seisoh, khamtam eh ki nongkawang bol Spin.
U Mewankitbok Kharpuri, uba la mad ïa ka jingïalehkai kaba seisoh ha ka Vinoo Mankad Trophy one day Tournament kaba la long shuwa ka Cooch Behar Trophy, u la pynkhihwin ïa ki nongtied ka Sikkim da ka jingtbit jong u ban kawang bol spin u la lah ban pynkut da ka jingkheiñ kaba bha, kata ban khur 5 wiket bad ailad tang 17 ron na ki 10.1 ober. Kiwei pat ki nongkawang bol kiba la noh synñiang ban pynhap wiket ki long u Gaurav Narleng (2/18 naki 6 ober), u Apandanka R Marak (2/21 naki 9) bad u Paisal Ali (1/0 naki 1). U nongtied ba kamai bun ron jong ka Sikkim udei u Deepak, da kaba kynjoh 16 ron.
Hadien kata, ka Meghalaya ka la hap noh ar ngut ki nongtied ha ki bynta ba sdang hynrei u Rudra Singh Rathor (24 ron na ki 44 bol, 4x4s) bad u Gaurav (22 ron naki 28 bol, 4x4s) ki la ïatreilang ban kamai 37 ron na ka bynta u wiket uba lai bad kane ka la paw ba ka la pynskhem ïa ka nongrim jong ka Meghalaya ha ka kylla ba nyngkong.
Hynrei ka jingkhyllem bun ki wiket ha ki kti jong u Parvin (3/26 na ki 11 ober) bad u Bhavya (5/17 na ki 3.2 ober) ka la pynlong ïa ka Meghalaya ban khyllem, bad ka la don ka khyllipmat ba ka kynhun ka la sahdien da tang 69 ron bad hap 8 wiket, kaba la i kumba kan nym lah ban kynjoh lane tam ïa ka thong kaba duna ba la buh jong ka Sikkim.
Hynrei donbok ba u Mewankitbok ula wan ban ïarap da kaba kamai 34 ron na ki 32 tylli ki bol (6x4s) bad ka Meghalaya ka la lah ban lamkhmat ïa ka inning kaba nyngkong kumjuh ruh ban kamai palat ïa ka jingkheiñ kaba 100 ron.
Ka Sikkim ka la sdang ïa ka Inning kaba ar ha ka jinglong syier hadien ba u Gaurav (1/6 na ki 3 ober) u la ïoh ban pynhap wiket ha ka ober ba nyngkong eh hynrei u Avneesh (23) bad u Sahil (18 not out) ki la ïatreilang ban kamai 43 ron. U Avneesh u khlem shym la lah ban neh haduh kaba kut jong ka sngi namar ba u la shah weng namar ka LBW ha u Mewan (1/19 naki 8 ober). Hynrei ka jingpyrshang jong u ka la pynthikna ba ka Sikkim kam shym la shah rem arsien ha ka sngi kaba nyngkong.
