Shillong, Nohprah 03: Ka Meghalaya ka la jop kput da 348 ron hadien ba ka la lah ban pynkhyllem lut ïa ki nongtied jong ka Arunachal Pradesh tang na ka bynta 90 ron ha ka sngi kaba lai jong ka jingïalehkai plate group ha ka U-19 men’s Cooch Behar Trophy 2025-26 kaba la long hynne ka sngi Balang ha MCA Ground, Polo.
Haba phaidien, ka Meghalaya ka la kamai 205 ha ka pali kaba nyngkong, ka la pynkut ïa ka Arunachal da tang 136 ron bad ka la kamai 298/5 shuwa ban pynkut ïa ka jingialehkai hynnin ka sngi ha ka pali tied kaba ar.
Ka Meghalaya ka la bynrap sa 71 ron hynne ka step shuwa ban shah pynhap noh na bynta 369 ron, kaba la buh ïa ka thong kaba jwat ïa ka liang pyrshah ban beh – namar ki donkam ban kynjoh 439 ron ban jop.
U Angkit Tamang u la kamai 10 ron hynne ka step hynrei u la shah weng noh namar ka run out ha ka por ba u dang kamai 97 ron; u dei u nongtied ba-ar jong ka Meghalaya uba la shah weng katba dang kynjoh ïa ka 90 tam hadien ka jingkhyllem u Dipayan Nandi (94) hynnin ka sngi.
U Heiyoomiki Ryngkhlem (32 khlem out na ki 26 bol) bad u Mewankitbok Kharpuri (27 na ki 16) ki la pynbyrngia da 11 tylli ki saw ron (fours) hapdeng jong ki ha ka jingïatreilang ban kamai 50 na ka bynta u wiket uba phra kaba la pynlong ïa ka Meghalaya ban lamkhmat 400 tam.
U Ayush Singh u la pynhap lai tylli ki wiket hynne ka sngi bad pynkut da ka jingkheiñ kaba 4/46 na ka bynta ka Arunachal.
Ka thong ka la paw ba ka long kaba palat ban beh bad ka Meghalaya ka la shim ïa ka bynta ha ka bol da ka jingsngew skhem. Baroh 10 wiket ki la khyllem tang hapoh 31 ober.
Ki nongkawang bol kiba la khur wiket na ka bynta ka Meghalaya ki long u Apandanka Marak (3/21), Gaurav Narleng (1/21), Mewankitbok Kharpuri (4/18) bad u Angkit (2/18). U Mewankitbok u la pynkut ïa ka jingïalehkai ha baroh ar kylla da ka jingkheiñ kaba 7/49.
Ka Meghalaya kan dang sah ha Shillong na ka bynta ka jingïakhun kaban wan, kaban long pyrshah ïa ka Nagaland naduh ka 08 tarik u Nohprah.
