Cooch Behar Trophy 2025-26: Bteng ka Meghalaya ban pynjlan ïa ka ron ban lamkhmat ïa ka Arunachal

Shillong, Nohprah 02: Ka Meghalaya ka la ïoh mad ïa ka jingïalehkai kaba bha tam ha ka sngi kaba ar ha ka jingïalehkai plate group jong ka U-19 Men’s Cooch Behar Trophy 2025-26 pyrshah ïa ka Arunachal Pradesh bad ka la lah ba kan kamai 298/5 ha ka pali tied kaba ar (2nd inning), ha kaba u Angkit Tamang u la duna khyndiat ban kynjoh ïa ka spah ron ha madan MCA, Polo hynne ka sngi.
Kumba ka paw ka Meghalaya ka don ha ka kyrdan kaba skhem bha namar ba ka lamkhmat da 367 bad ka dang don ha ka pali tied. Kham hashwa, ka Arunachal ka la sdang biang ïa ka pali tied ba nyngkong na ka 94/6 ban beh ïa ka thong kaba 205 ron ba ka Meghalaya ka la buh. Hynrei ka la shah pynkhyllem noh na ka bynta 136 ron, kaba pynlong ïa ka Meghalaya ban lamkhmat da 69 ron ha ka pali kaba nyngkong.
U Narleng u dei u rangkawang bol ka Meghalaya uba seisoh tam da kaba khur 3/28 na ki 9 ober, katba u Leg Spinner u Mewankitbok Kharpuri u la khur 3/31 ha ki 15.2 ober. Kiwei pat kiba la ïoh ban khur wiket ki long u Apandanka (2/26 na ki 11), u Benedict Jones Makdoh (1/15 na ki 3) bad u Angkit (1/16 na ki 6).
Ka Meghalaya ka la donkam ban pynbha ïa ka jingkheiñ jong ka ha ka pali ïalehkai ba nyngkong hynrei ka la hap noh kloi ïa u wiket bad nangta u rangïalehkai ba nyngkong u Sameer Choudhury u la hap ban shongthait noh namar ka jingmynsaw.
Nangta u Dipayan Nandi bad u Narleng ki la wan lang ban noh synñiang 83 ron ha ka por kaba stet bha, tang naki 86 tylli ki bol. Khamtam eh u Dipayan, u la kamai 94 ron na ki 80 tylli ki bol ba kynthup ïa 15 tylli ki saw ron (fours) bad kawei ka hynriew ron (six) shuwa ba un shah pynhap.
Hadien kane u Narleng u la khyllem noh da 32 ron hynrei u Gaurav Jyoti Thakuria bad u Angkit ki la shim ïa ka jingkitkhlieh bad ïatreilang ban kamai 131 ron. Kine ki shijur ki la jan pynkut ïa ka sngi ryngkat lang hynrei phew se u Thakuria (56 ron) u la shah weng noh namar ka run out.
U Angkit u la pynkut ïa ka sngi da kaba kamai 87 ron khlem out na ki 120 tylli ki bol, kiba kynthup ïa hynriew tylli ki saw bad kawei ka six. U don ïa u Rudra Singh Rathor (12 ron) ha kawei pat ka tduh bad kine ki arngut kin khmihlynti ban pynjlan ïa ka jingkheiñ jong ka Meghalaya sha palat ïa ka 400 mynta ka sngi.