Cooch Behar Trophy 2025-2026: Lehbha ka Sikkim ha ka tied ban buh ïa ka thong kaba jwat ïa ka Meghalaya

Shillong, Naiwieng 16: Ka 150 ron khlem da shah pynhap na u kapten u Denree Lepcha ka la ïarap ïa ka Sikkim ban buh ïa ka thong ba paka ïa ka Meghalaya ban beh ha ka jingïalehkai plate group jong ka lympung U-19 men’s Cooch Behar Trophy kaba la long ha madan kriket ka MCA, ha Polo, hynne ka sngi Nyngkong.
Haba sdang biang ïa ka pali kaba ar (2nd Inning) na ka 46/2, ka Sikkim ka la kamai 291 ron shuwa ban khyllem baroh ki nongtied, bad ka la buh ïa ka Meghalaya ba kan donkam 260 ron khnang ban jop. Haba shimti ïa ka pali tied kaba ar (2nd Inning), ka kynhun jong ka jylla ka la shah pynhap 3 wiket da kaba kamai 53 ron, bad ki dang donkam sa 207 ron ban poi sha ka thong. Haba phaidien, ka Sikkim ka la shah pynkut tang na ka bynta 76 ron hynnin ka sngi U Blei bad ka Meghalaya ruh ka la shah khanglad tang na ka bynta 108 ron ha ka pali tied ba nyngkong jong ki (1st Inning).
Ha kane ka sngi ka Sikkim ka la ïoh mad ïa ka jingïalehkai kaba kham seisoh ha ka liang ki nongtied, ha kaba u Sahil (51 ron na ki 164 tylli ki bol) u la noh synñiang shiteng ïa ka spah ron hynrei ka jingnoh synñiang kaba khraw pat ka la wan na u Denree. Une u nongtied, uba long ruh u wicketkeeper jong ka kynhun, u la thlieh naphang haduh 22 tylli ki saw ron (fours) bad ar tylli ki hynriew ron (six) ban kamai 150 ron na ki 198 tylli ki bol. Ryngkat lang, ma u lem bad u Sahil ki la bynrap 105 ron na ka bynta u wiket uba saw bad u Denree u la bteng ban ïoh jingkyrshan na ki nongtied kiba bud nadien ban buh ïa ka thong kaba shongkun na ka bynta ka Meghalaya ba kan beh.
Tang mar ïa kynjoh sha ka 150 ron, u paralok jong u Denree u Abi u la shah pynhap noh haka bol jong u Gaurav Narleng (khur 2/22 ha ki 9.5 ober) ban pynkut noh ïa ka pali tied kaba ar jong ka Sikkim. U Mewankitbok Kharpuri u la lah ban khur 3 wiket bad ailad 48 ron na ki 19 ober na ka bynta ka jingkheiñ kaba long 8/65 ha baroh ar tylli ki inning, katba u Rudra Singh Rathor (2/44 naki 17) bad u Paisal Ali (1/13 ha ka 5.3) ruh ki la noh synñiang da kaba khur wiket na ka bynta ka Meghalaya.
Ka jingïalehkai kaba skhem ha ka pali tied kaba ar ka la ai mynsiem shisha ïa ki nongïalehkai ka Sikkim ha kane ka jingïakhun ha kaba ka kynhun ki nongïalehkai ka Meghalaya ki la hap ban shah ïa ki jingtynjuh kiba jwat ha ki ar kynta haba wanphai ha ka pali tied.
U Rudra u la shah weng noh tang na ka bynta 4 ron bad uwei pat u nongtied ba sdang jong ka kynhun, u Bishesh Chettry, uba la shah pynhap noh ha u nongkawang bol spin u Aadnan tang na ka bynta 21 ron. Hadien kata, u Aadnan u la pynkhyllem noh ïa u Dipayan Nandi (19 ron) ha ka ober ba khatduh jong ka sngi, ha kaba ka Meghalaya kan sdang biang ha kane sngi ba-ar na ka 53/3, ryngkat ka thong kaba shyrkhei ha khmat jong ki. U Aadnan u la pynkut ïa ka sngi da ka jingkheiñ kaba 2/7 ha ki 4.3 ober, katba u Pema uba la weng noh ïa u Rudra u la khur 1/15 ha ki 6 ober.